मोन्टेभिडियो (एजेन्सी) – फिफा विश्वकप २०१८को छनोट अन्तर्गत ब्राजिलले १ गोलले पछाडी परेको स्थितिलाई उल्टाउँदै उरुग्वेलाई ४-१ले पराजित गरेको छ।

खेलको ८औं मिनेटमा एडिन्सन कभानीको पेनाल्टी गोलको मद्दतले उरुग्वे खेलमा अगाडी बढेको थियो। तर, पौलिन्होले १८औं मिनेटमै खेललाई बराबरीमा ल्याए। दोश्रो हाफको सुरुवातमै पौलिन्हो पुन: गोल गर्दै ब्राजिलललाई अग्रता दिलाएका थिए।

खेलको ७५औं मिनेटमा नेयमारले गोल गर्दै ब्राजिललाई ३-१ले अगाडी पुर्याएका थिए। जारी विश्वकप छनोटमा अहिलेसम्म घरेलु मैदानमा नहारेको उरुग्वेको पराजय पक्का गर्न पौलिन्होले ९०औं मिनेटमा आफ्नो ह्याट्रिक पुरा गर्दै ४-१को जित सुनिश्चित गरे।

जितसंगै ब्राजिलले शीर्ष स्थानमा आफ्नो पकड बलियो पारेको छ। १३ खेलमा ३० अंक जोडेको ब्राजिल दोश्रो स्थानमा रहेको उरुग्वेभन्दा ७ अंक अगाडी छ।