ब्रानक्विला (एजेन्सी) – कप्तान हामेज रोड्रिग्वेजको गोलमा कोलम्बियाले बोलिभियालाइ १–० ले हराउदै विश्व कप अन्तर्गत दक्षिण अमेरिकी छनोट अंकतालिकाको चौथो उक्लन सफल भएको छ ।
निकै नै रोमाञ्चक बन्दै गरेको दक्षिण अमेरिकी छनोटमा यसअघि पाँचौ स्थानमा रहेको कोलम्बियाले जितसँगै एक स्थान माथि चढेको हो । १० राष्ट्र सम्मिलित दक्षिण अमेरिकी छनोटमा शीर्ष चार टोली स्वतः विश्व कपमा छनोट हुने प्रावधान छ ।
हुवान क्वारड्राडोलाई लडाएपछि पाएको पेनाल्टीलाई पहिलै गोल गर्न नसकेका कप्तान रोड्रिग्वेजले फर्किएर आएको बललाई सहजै ट्याप गर्दै आफ्नो टोलीलाई महत्वपूर्ण अंक दिलाएका थिए । बोलिभियाका गोलरक्षक कार्लोस लाम्पेले रोड्रिग्वेजको प्रहार रोकेपछि फर्किएको बललाइ ८३ औं मिनेटमा उनले सदुपयोग गरेका थिए ।
जितसंगै कोलम्बिया २१ अंक सहित चौथो स्थानमा छ भने ब्राजिल, उरुग्वे र अर्जेन्टिना क्रमशः ३०,२३ र २२ अंकसहित पहिलो , दोस्रो र तेस्रो स्थानमा छन् । पाँचौ र छैठौ स्थानमा रहेका इक्वेडर र चिलीको समान २० अंक छ ।
शुक्रबारका अन्य छनोटमा अन्य खेलमा ब्राजिलले उरुग्वेलाई ४–१, अर्जेन्टिनाले चिलीलाई १–०, पाराग्वेले इक्वेडरलाई २–१ ले हरायो भने भेनेजुएला र पेरुले २–२ को बराबरी खेलेका थिए ।
