गिजोन (एजेन्सी) – विश्व कप फुटबल अन्तर्गतको युरोपेली छनोटमा स्पेनले घरेलु मैदानमा इजराइललाई ४–१ ले हराएको छ ।

समूह ‘जि’को खेलमा स्पेनले तेस्रो स्थानमा रहेको इजराइललाई ३ गोलको अन्तरले हराएपछि समान १३ अंक भएको इटालीलाई पछि पार्दै गोलअन्तरका आधारमा स्पेन शीर्षस्थानमा रहेको छ । इटाली दोस्रो र इजराइल ९ अंक सहित तेस्रो स्थानमा छ ।

खेलको सुरुवात देखि घरेलु दर्शकको सामु खेलमा हावी रहेको स्पेनका लागि डेभिड सिल्भा, भिटोलो, डिएगो कोस्टा र इस्कोले गोल गरे । इजराइलका लागि एक मात्र गोल बेल्जियम लिगमा क्लब ब्रुगेसंग आबद्ध ३० बर्षिय मिडफिल्डर लियोर रेफैलोभले गरे ।

खेलको १५ औं मिनेटमा म्यानचेस्टर सिटीका सिल्भाले गोलकिपरको बिचबाट बल छिराउदै गोल गरेका थिए । पहिलो हाफको इन्जुरी समयमा सेभिल्लाका स्ट्राइकर भिटोलोले स्पेनको अग्रता दोब्बर गरे ।

दोस्रो हाफमा ५१ औं मिनेटमा कोस्टाले स्पेनको लागि तेस्रो गोल गरे । स्पेनको लागि कोस्टाको चौथो खेलमा यो चौथो गोल हो । जराइललाई रेफैलोभले ७६ औं मिनेटमा गोल गरेका थिए । रियल मड्रिडका मिडफिल्डर इस्कोले गोल गर्दै ४–१ को जित सुनिस्चित गरे ।

नौ समुह रहेका युरोपेली छनोटमा हरेक समूहको शिर्षस्थानका टोली स्वतः विश्वकपमा छनोट हुनेछन् । त्यस्तै उत्कृष्ट ८ उपविजेताले पनि विश्वकपमा प्रवेश पाउनेछन् ।