मनिला (हाम्रो खेलकुद) – एएफसी एसियन कप छनोट अन्तर्गत तेस्रो चरणको खेलमा भोलि नेपाल र फिलिपिन्स भिड्दै छन । बिराज महर्जनको कप्तानिमा रहेको टोलीले भोलि नेपाली समय अनुसार बेलुकी पौने ६ बजे रिजाल मेमोरियल स्टेडियममा घरेलु टोलीको सामना गर्नेछ ।

यसअघि चार पटक फिलिपिन्ससँग खेल्दा नेपालले एकमा जित र तीनमा पराजय बेहोरेको थियो । सन् १९८२ मा पहिलो पटक फिलिपिनो टोलिसँग खेल्दा १-० ले बिजयी भएको नेपाली टोलि पछिल्ला तीन खेलमा भने फराकिलो अन्तरले पराजित भएको थियो ।

नेपाली टोलिका कप्तान बिराज महर्जनले विगतलाइ बिर्सदै नेपालले भोलि फिलिपिन्सविरुद्ध उत्कृष्ट प्रदर्शन गर्ने दाबी गरेका छन । भोलि हुने खेलको बारेमा जनकारी दिन आयोजित पत्रकार सम्मेलनमा बोल्दै नेपाली कप्तानले पछिलो समय नेपाली फुटबलले पाएको सफलताको कारण टोली उत्साहित रहेको भन्दै घरेलु टोलीलाइ उसकै भुमीमा निराश पार्न आफुहरु आतुर रहेको बताए 

नेपाली टोलिका प्रमुख प्रशिक्षक ग्योतोकु कोजीले फिलिपिन्स माथिल्लो स्तरको टोली भएतापनि आफ्नो टोली उसलाई टक्कर दिन सक्षम रहेको दाबी गरेका छन । प्रशिक्षक कोजीले सन्तुलित नेपाली टोलीले आफ्नो क्षमता अनुसार खेल्न सके घरेलु टोलीविरुद्द तीन अंक खोस्न सक्ने बताए ।

उता फिलिपिनो टोलिका कप्तान फिलिप जेम्स योङहज्बेन्डले कमजोरीहरु सुधार्दै मैदान उत्रने हो भने नेपालविरुद्धको जित टाढा नभएको बताए । उनले केही दिन अघि भएको मलेसियासंगको मैत्रीपुर्ण खेलमा पाएको अवसर खेर फाल्दा गोलरहित बराबरी भएको भन्दै नेपालविरुद्ध टोलीले त्यो कमजोरी सुधार्ने प्रतिवद्धता व्यक्त गरे ।

पत्रकार सम्मेलनमा बोल्दै फिलिपिनो टोलीका प्रशिक्षक थोमस डेनिस डुलेले नेपाली टोलिले पछिल्लो समय राम्रो फुटबल खेली रहेको बारे आफुहरु अनभिज्ञ नरहेको बताए । उनले नेपालविरुद्ध पछिल्ला खेलहरुमा आफ्नो टोलीले सहज जित हात पारे पनि फुटबलमा इतिहासले प्रभाव नपार्ने तर्क गरे । उनले त्यति बेलाको र अहिले नेपाली टोलिमा परिवर्तन रहेको भन्दै आफ्नो टोली सतर्क भएर मैदान उत्रने बताए । उनले नेपाली टोलीमा रहेका केही खेलाडीहरु अत्यन्तै प्रतिभाशाली भएको भन्दै तिनले आफ्नो स्वभाविक खेल खेल्ने हो भने आफ्नो टोलीलाइ अप्ठेरो पार्ने बताए ।

आफुहरु एसियन कप जस्तो ठूलो प्रतियोगिता खेल्न तयार र सक्षम रहेको दाबी गर्दै फिलिपिनो प्रशिक्षक थोमसले भने ” तर त्यसकालागि पहिले छनोटमा राम्रो गर्नु पर्ने छ र पहिलो खुड्किलाको रुपमा रहेको नेपालबिरुद्ध जित हात पार्नु पर्ने छ । नेपाल हाम्रोलागी ब्राजिल अर्जेन्टिना जस्तो हराउनै नसकिने टोलि पनि होइन उनिहरु हामी भन्दा कमजोर नै छन ।”

नेपाल र फिलिपिन्सबिचको खेल मंगलबार साँझ नेपाली समयानुसार ५:४५ बजे सुरु हुनेछ।