मनिला (हाम्रो खेलकुद) – एएफसी एसियन कप छनोट अन्तर्गत तेस्रो चरणको खेलमा भोलि नेपाल र फिलिपिन्स भिड्दै छन। नेपाली समय अनुसार मंगलबार बेलुकी पौने ६ बजे रिजाल मेमोरियल स्टेडियममा नेपालले घरेलु टोलीको सामना गर्नेछ।
खेलको अघिल्लो दिन पत्रकार सम्मेलनमा बोल्दै फिलिपिनो टोलीका प्रशिक्षक थोमस डेनिस डुलेले नेपाली टोलिले पछिल्लो समय राम्रो फुटबल खेली रहेको बारे आफुहरु अनभिज्ञ नरहेको बताए । उनले नेपालविरुद्ध पछिल्ला खेलहरुमा आफ्नो टोलीले सहज जित हात पारे पनि फुटबलमा इतिहासले प्रभाव नपार्ने तर्क गरे । उनले त्यति बेलाको र अहिले नेपाली टोलिमा परिवर्तन रहेको भन्दै आफ्नो टोली सतर्क भएर मैदान उत्रने बताए । उनले नेपाली टोलीमा रहेका केही खेलाडीहरु अत्यन्तै प्रतिभाशाली भएको भन्दै तिनले आफ्नो स्वभाविक खेल खेल्ने हो भने आफ्नो टोलीलाइ अप्ठेरो पार्ने बताए ।
आफुहरु एसियन कप जस्तो ठूलो प्रतियोगिता खेल्न तयार र सक्षम रहेको दाबी गर्दै फिलिपिनो प्रशिक्षक थोमसले भने ” तर त्यसकालागि पहिले छनोटमा राम्रो गर्नु पर्ने छ र पहिलो खुड्किलाको रुपमा रहेको नेपालबिरुद्ध जित हात पार्नु पर्ने छ । नेपाल हाम्रो लागी ब्राजिल अर्जेन्टिना जस्तो हराउनै नसकिने टोली पनि होइन उनिहरु हामी भन्दा कमजोर नै छन ।”
