काठमाडौं (हाम्रो खेलकुद) – एएफसी एसियन कप छनोटअन्तर्गत फिलिपिन्सविरुद्धको पहिलो खेल मंगलबार ४–१ ले गुमाएको नेपाली राष्ट्रिय टोली भोली स्वदेश आइपुग्ने भएको छ । टोली ड्रागन एयरको विमानमा फिलिपिन्सको मनिलाबाट हङकङ हुँदै राती ९ः५५ बजे त्रिभुवन अन्तराष्ट्रिय विमानस्थलमा आइपुग्ने बताइएको छ ।
फिलिपिन्सविरुद्ध खेल सुरु भएको केही मिनेटमै दस खेलाडीमा सिमित भएको नेपालले पहिलो हाफमा ३ र दोस्रो हाफमा १ गोल खाएको थियो । नेपालका लागि एकमात्र गोल विशाल राईले पहिलो हाफको इन्जुरी समयमा फर्काएका थिए । सन् १९८२ मा फिलिपिन्सलाई १–० ले हराएको नेपालले त्यसपछिका चारै खेलमा नेपाल पराजित भएको छ । २०११ को अक्टुबरमा ४–० तथा २०१४ को अप्रिल र अक्टुबरका दुई खेलमा नेपालले समान ३–० को नतिजा सुम्पेको थियो । झन्डै तीन बर्षपछि मंगलबारको खेलमा नेपाल फेरी पराजित भएको छ ।
