इरानमा भइरहेको ए.एफ्.सी यु१९ च्याम्पिएनसिप छनोटमा नेपाल आफ्नो समुहको अन्तिम खेलमा जोर्डनसंग भिड्दै छ
पहिलो खेलमा इरानसंग १०-०को फराकिलो हार व्यहोरेको नेपालले दोश्रो खेलमा कुवेतसंग १-१को बराबरी खेलेको थियो| नेपालले दोश्रो खेलमा कप्तान विमल घर्ती मगरको गोलले अग्रता लिएपनि खेलको अन्त्यतिर गोल खाएर बराबरीमा रोकिएको थियो|
नेपालको लागि छनोटको गणितिय सम्भावना अझै छ भने प्रतिद्वन्दि जोर्डन भने प्रतियोगिताको अन्तिम चरणमा नपुग्ने पक्का भइसकेको छ| जोर्डनले पहिलो खेल कुवेतसंग २-१ले हारेको थियो भने दोश्रो खेलमा नतिजा ३-०ले इरानलाई सुम्पेको थियो|
समूह बिजेता हुने सम्भावना यसअघिनै सकिसकेको नेपाल उपविजेता बन्ने लक्ष्य साथ मैदानमा उत्रनेछ| नेपालले छनोट हुनका लागि समुहको उपविजेता हुन जरुरी छ| उपविजेता बन्नका लागि नेपालले जोर्डनविरुद्ध फराकिलो जित हात पार्नुपर्नेछ भने इरानले पनि कुवेतलाई फराकिलो जित दर्ता गर्नुपर्छ|
पाँच उत्कृष्ट समुह उपविजेता पनि अन्तिम चरणमा जाने भएकाले गणितिय सम्भावना जिवितै रहेको हो| जोर्डनलाई हराएको खण्डमा नेपालको छनोट हुने झिनो आशा कायम रहनेछ| अन्य समुहको नतिजाले पनि समीकरण उथलपुथल पार्ने हुनाले नेपालको लागि अरु नतिजाले पनि ठुलो भूमिका खेल्नेछ|
गत महिना किर्गीस्तान्मा भएको यु१६को छनोटमा पनि नेपाल पाँच उत्कृष्ट उपविजेता मध्य एक भएर अन्तिम चरणमा पुगेको थियो| त्यसबेला अन्य खेलको नतिजा नेपालको छनोटको लागि अनुकुल हुँदा अन्तिम चरणमा पुग्न सफल भएको थियो| अहिलेको यु१९को समिकरण यु१६ छनोटको समयभन्दा निकै कठिन देखिएको छ|
