बोलिभिया (एजेन्सी)– कप्तान लियोन मेस्सीमाथिको ४ खेलको प्रतिबन्ध अर्जेन्टिनालाई महंगो परेको छ । विश्व कप दक्षिण अमेरिकी छनोटको खेलमा मेस्सी विना उत्रनेका अर्जेन्टिना बोलिभियासँग २–० ले पराजित भएको छ ।
अर्को बर्ष रुसमा हुने विश्व कपका लागि भइरहेको छनोटमा को छनोट अन्तर्गत बुधबार बिहान भएको खेलमा अर्जेन्टिनाले हार बेहोरेको हो । हुवा कार्लो आर्स र मार्सेलो मार्टिन्सको गोलमा बोलिभिया विजयी भएको हो ।
खेलको ३१ औं मिनेटमा आर्सले गोल गरे भने ५३ औं मिनेटमा मार्टिन्सले गोल थपे । गत शुक्रबार बिहान चिलीसँग भएको खेलमा लाइन्स म्यानलाई अभद्र व्यवहार गरेका कारण मेस्सीमाथि चार खेलको प्रतिबन्ध लागेका छ ।
मेस्सीलाई खेल सुरु हुनु केही घण्टाअघि मात्रै फिफाले प्रतिबन्धको निर्णय गरेको थियो । हारपछि अर्जेन्टिना अंक तालिकाको पाँचौं स्थानमा झरेको छ ।
टोलीको १४ खेलबाट २२ अंक छ । छनोटका चार खेल बाँकी रहँदा अर्जेन्टिनामाथिको दबाब बढेको छ । अझै तीन खेलमा मेस्सी हुने छैनन् । बुधबार बिहानको अर्को खेलमा भेनेजुएलालाई ३–१ ले हराँदै चिली चौथो स्थानमा उक्लेको छ ।
