फुन्साल (एजेन्सी)– पहिलो हाफको अग्रता जोगाउन नसक्दा पोर्चुगलले घरेलु दर्शक सामु स्विडेनसँग मैत्रीपूर्ण खेलमा पराजित भएको छ । करिब १० हजार दर्शकको उपस्थिति रहेको खेलमा मडिराको फुन्सालमा पोर्चुगलले १६ वर्षपछि पहिलो पटक अन्तराष्ट्रिय खेल खेलेको थियो । तर पहिलो हाफको २–० को अग्रता जोगाउन नसक्दा पोर्चुगल ३–२ ले पराजित भएको थियो ।

कप्तान क्रिस्टियानो रोनाल्डोले १८ औं मिनेटमा गोल गर्दै टोलीलाई अग्रता दिलाएका थिए । २१ बर्षे गेल्सन मार्टिन्सको दायाँबाट दिएको क्रसमा रोनाल्डोले भलिमार्फत गोल गरेका हुन् ।

३४ औं मिनेटमा स्विडेनका एन्ड्रेस ग्रानभिस्टको आत्मघाती गोलमा पोर्चुगलको गोअन्तर दोब्बर भएको थियो । रोनाःडोले मार्टिन्स तर्फ दिएको पासलाई रोक्ने प्रयास गर्दा ग्रानभिस्टकोको प्रहार आत्मघाती गोलमा परिणत भयो । दोस्रो हाफमा भिक्टर क्लेसोनको २ गोलको मद्दतमा स्विडेन खेलमा फर्केको थियो ।

५७ औं मिनेटमा पहिलो गोल गरेका क्लेसोनले ७५ औं मिनेटमा अर्को गोल गर्दै खेललाई बराबरीमा पुर्याएका थिए । इन्जुरी समयको अन्तिम मिनेटमा स्विडेनको निकलस हल्टको क्रसलाई रोक्न जोएयो क्यान्सेलोले आत्माघाती गोल गरेपछि पोर्चुगल पराजित भएको थियो ।