काठमाडौं (हाम्रो खेलकुद)- कुलेश्वर ‘ए’ ले वार्नर अल्बर्ट सिक्स ए साइड यू १४ फुटबल प्रतियोगिताको उपाधि जितेको छ । नेपाल युथ प्रोग्राम र कुलेश्वर आवास युथ काउन्सिल (केवाइएसी) को संयुक्त आयोजनामा शनिबार सम्पन्न प्रतियोगितामा कपन ‘ए’ लाई २–१ पराजित गर्दै कुलेश्वर ‘ए’ले उपाधि जितेको हो।

प्रतियोगितामा कुलेश्वर ‘ए’ र ‘बी’ तथा कपन ‘ए’ र ‘बी’ टोलीको सहभागिता थियो । कपनका विशाल मोक्तान उत्कृष्ट खेलाडी तथा कुलेश्वरका हिमाल श्रेष्ठ उत्कृष्ट गोलकिपर घोषित भए । प्रतियोगितामा सहभागी खेलाडीका लागि प्रतियोगितासहित क्याम्पको पनि आयोजना गरिएको थियो । नेपाली राष्ट्रिय टोलीका पूर्व प्रशिक्षक होल्गर ओभरम्यानले विजेता टोलीका खेलाडीलाई पुरस्कृत गरे ।

ओभरम्यानले आफुले दोस्रो घरका रुपमा मानेको नेपाल आउँदा खुसी लाग्ने बताए । उनले नेपाल युथ प्रोगाम र केवाइएसीको प्रयासको सरहना गर्दै फुटबल विकासका लागि ग्रासरुटबाट काम गर्नुपर्ने सुझाव दिए । केवाइएसीका अध्यक्ष सुलभ शरण केसीले सानै उमेर देखि फुटबलको स्कील र अनुशासनमा ध्यान दिनका लागि क्याम्प सञ्चालन गरिएको बताए । सो कार्यक्रममा नेपाल युथ प्रोग्रामका अध्यक्ष्य राजीव नेपालीले ग्रासरुट फूटबल विकासका लागि यस्तो कार्यक्रम महत्वपूर्ण रहेको बताए।