एजेन्सी – रियल म्याड्रिडका पुर्व प्रशिक्षक एवं हाल बायर्न म्युनिखका प्रशिक्षक रहेका इटालियन कार्लो एन्चेलोटिले हालको रियल म्याड्रिड टोली बायर्नभन्दा नराम्रो रहेको प्रतिक्रिया दिएका छन्।

युरोपेली च्याम्पियन्स लिग अन्तर्गत बुधबार राती हुने बायर्न म्युनिख र रियल म्याड्रिडको खेल अगाडी एन्चेलोटिले यस्तो प्रतिक्रिया दिएका हुन्। ‘रियल राम्रो टोली हो र स्पेनिस लिग रियलको हातमा रहेको छ। उत्कृष्ट आक्रमण भएको यस टोलीले लिग जित्ने पक्काजस्तै छ’, उनले भने।

सन् २०१३ देखि २०१५सम्म म्याड्रिडमा रहेका एन्चेलोटिले त्यहाँ रहेर च्याम्पियन्स लिगको उपाधि जितेका थिए। तर उनले आफ्नो रियलसंगको पुरानो सम्बन्धले बायर्न र रियलको खेलमा केहि फरक नपर्ने बताए। ‘म आजकल म्याड्रिडको खेलाडीहरुसंग सम्पर्कमा छैन। मलाई उनीहरुको बलियो र कम्जोर पक्ष राम्ररी थाहा छ। तर जिदानले भोलि कसरि खेल खेलाउनेछन् त्यो भने उनि बाहेक कसैलाई थाहा हुन्न’, उनले थपे।

म्याड्रिड राम्रो टोली भएपनि बायर्न अहिलेको अवस्थामा म्याड्रिडभन्दा राम्रो रहेको पनि उनले बताए। ‘जिदान र उनको टोली अहिले राम्रो फर्ममा छ। तर मेरो लागि आफ्नो टोली चिन्ताको विषय हो र मलाई थाहा छ यो खेल एकदम रोमान्चक हुनेछ। दुवै टोली आफ्नो उत्कृष्ट प्रदर्शन गर्ने धुनमा हुनेछ‘, उनले भने।