सुवास हुमागाई
काठमाडौं – क्लब करियर सुरु गर्नुअघि १७ बर्षको उमेरमा नै रोहित चन्द राष्ट्रिय फुटबल टोलीबाट डेब्यू गरेका थिए । कलिलो उमेरमै विदेशमा खेल कौशलमार्फत चर्चा कमाएका रोहित अहिले २५ बर्षका भए । यो ८ बर्षे यात्रामा उनले नेपालका लागि ४३ अन्तराष्ट्रिय खेल खेलिसकेका छन् । उनको व्यवसायिक खेल जीवन हेर्दा लोभ लाग्दो छ । क्लब फुटबलमा एकपछि अर्को सिढी चढ्दै गरेका रोहितमाथि राष्ट्रिय टोलीबाट भने सोचे अनुरुपको प्रदर्शन गर्न नसकेको आरोप लाग्ने गरेको छ ।

सन् २०१३ मा घरेलु मैदानमा सम्पन्न साफ च्याम्प्यिनसिपमा नेपाल फाइनलको अत्यन्त निकट पुगेका थियो । अफगानिस्तान अघि बढेको खेलमा नेपालले पेनाल्टी पाएको थियो । त्यो पेनाल्टीमा गोल हुन सकेको भए सम्भवतः नेपाल पहिलो पटक साफ च्याम्पियनसिपको फाइनल पुग्ने थियो ।

अफगानिस्तानविरुद्धको त्यो सेमिफाइनलमा पाएको पेनाल्टी रोहितले हान्ने मौका पाए । उनी गोल गर्न असफल भए । विपक्षी खेलाडीको गल्तिका कारण रेफ्रीले नेपाललाई रिटेक पेनाल्टी दिए । त्यसमा पनि रोहितलाई नै मोका दिइयो, दोस्रो पटक पनि उनको प्रहार अफगातिस्नाका गोलकिपरले रोके । त्यहाँबाट उनको आलोचनाको श्रृखंला सुरु भयो । अहिले पनि रोहितको प्रसंग आउँदा फुटबल प्रेमी त्यहि पेनाल्टीमा गोल गर्न नसकेको घटना स्मरण गरिहाल्छन् । त्यो खेलदेखि नै रोहितमाथि सकारात्मक भन्दा बढी नकारात्मक टिप्पणी आउने गरेको छ । यद्दपी उनी विचलित भने देखिदैनन् ।

त्यसयता रोहितले राष्ट्रिय टोलीबाट नेपाली दर्शकमाझ खुलेर खेल्ने मौका पनि पाएका छैनन् । २०१५ को अन्त्यतिर भारतको केरालामा भएको साफ च्याम्पियनसिपमा उनलाई मिडफिल्डरको भूमिकामा उतारियो । रोहितले आफ्नो भूमिकामा न्याय गरेपनि टोली पहिलो चरणबाटै बाहिरएपछि उनको प्रदर्शनलाई मात्र स्मरणमा रहने कुरै भएन । संयोग भनौं वा दुर्भाग्य, नेपालले गत बर्ष २०१६ मा ३ वटा उपाधि जित्दा रोहित चोटका कारण टोलीमा थिएनन् । रोहित विना पनि जित्न सक्ने रहेछ भन्नेका लागि अर्को बलियो आधार ती तीन सफलताले दियो पनि ।

फिलिपिन्सविरुद्ध चैत १५ गते एसियन कपको छनोट चरणको पहिलो खेलमा रोहितले राष्ट्रिय टोलीमा पुनरागमन गरे । खेलमा नेपाल ४–१ ले पराजित भएको यिो । त्यसमा रोहितको प्रदर्शन सन्तोषजक थियो । चोटपछि खेलेको पहिलो अन्तराष्ट्रिय खेलमा गरेको प्रदर्शनले उनलाई पुनः इन्डोनेसियाको पुरानै क्लब पर्सिजा जाकार्तासँग फेरी आबद्ध हुने मौका मिल्यो । यसअघि झन्डै अढाई बर्ष उनले त्यो क्लबको जर्सी लगाइसकेका छन् । पर्सिजापछि रोहितले २०१६ मा मलेसियाको टिटिम एफसीमा आबद्ध भएका थिए ।

तर, दुर्भाग्य मलेसिया यात्रा उनका लागि पीडादायी रह्यो । गत बर्ष फेब्रुअरीमा मलेसियामा खेल्दा उनलाई चोट लाग्यो । कतिपयले उनको खेल जीवन सकिएको अनुमान पनि गरेका थिए । एसिएल चोट लागेकाले रोहितले उतै शल्यक्रिया गराए । केहि महिना विश्राम लिएका रोहितले कोलकातामा गएर ग्राउण्ड रिकभरी गरे । केहि महिना फिटनेसका लागि स्वयम प्रशिक्षण गरेका रोहितले फुटबल मैदानमा फर्किन लक्ष्मी हुन्डाई मनाङ मस्र्याङ्दी रोजे ।

माघमा पोखरामा भएको आहा गोल्ड कप मनाङलाई जित्न महत्वपूर्ण भूमिका खेलेका रोहित त्यसपछिको झापा गोल्डकपमा दिलाउन पनि उत्तिकै योगदान गरेका उनी प्रतियोगिाताकै सर्वोत्कृष्ट खेलाडी बनेर फर्किए । घरेलु फुटबलमा लगातार दुई उपाधिपछि रोहितले बंगलादेशमा भएको शेख कमल अन्तराष्ट्रिय क्लब क्लबमा पनि उच्च प्रदर्शन गरे । क्लबको आवश्यकता अनुसार विभिन्न पोजिसनमा आफुलाई ढालेका रोहितले त्यहाँपनि केहि क्लबले उनीप्रति चासो देखाएका थिए ।

तर, यसपटक पनि उनको रोजाइ इन्डोनेसिया नै रह्यो । इन्डोनेसियामा केवल १ दिनको प्रशिक्षण र १ मैत्रीपूर्ण खेलको आधारमा प्रशिक्षकले रोहितलाई रोजे । इरानी खेलाडीको सट्टामा प्रशिक्षकको नजर उनमाथि पर्यो । रोहितले पर्सिजामा आक्रामक मिडफिल्डरको भूमिका निभाउने बताइएको छ । आउने एक सिजन उनी त्यहि क्लबबाट खेल्ने छन् । पछिल्लो सम्झौताले उनमा अझै पुरानै क्षमता रहेको मान्न सकिन्छ । समयसंगै आफुलाई निखार्दै लागेका रोहितले क्लब फुटबलमसंगै राष्ट्रिय टोलीबाट पनि उत्तिकै राम्रो प्रदर्शन गर्दै आएका छन् । तर समर्थकमाझ छाप बनाउन उनी संलग्न राष्ट्रिय टोलीले नतिजा दिनसक्नु पर्दछ ।

जति राम्रो खेलाडी भएपनि आखिर उसलाई मापन गर्ने उसले प्राप्त गर्ने सफलताकै आधारमा हो । एसियन कपको छनोटमा नेपाल, फिलिपिन्सका अलगा यमन र ताजिकस्तान पनि छन् । नेपालले अब दुई अवे र तीन होम म्याच खेल्नुपर्नेछ । यो छनोटलाई एन्फाले यसै बर्ष आयोजना हुने साफ च्याम्प्यिनसिपको तयारीका रुपमा हेरेको छ । एसियन छनोटका खेलबाट निखार्दै नेपालले साफ च्याम्पियनसिपको उपाधि जित्न सके नेपाली टोली दक्षिण एसियाको वास्तविक च्याम्पियन मात्र बन्ने छैन रोहितमाथिको आलोचना पनि पक्कै मथ्थर हुँदै जानेछ ।