वीरगन्ज (हाम्रो खेलकुद)– त्रिभुवन आर्मी क्लब वीरगन्जमा जारी टुबोर्ग प्रथम विशाल स्मृति गोल्ड कप फुटबल प्रतियोगिताको सेमिफाइनलमा पुगेको छ । अर्को ए डिभिजन क्लब हिमालयन शेर्पा क्लबलाई मंगलबार टाइब्रेकरमा ४–३ ले हराउँदै अन्तिम चारमा पुगेको हो ।
त्रिभुवन आर्मी क्लब । (फाइल तस्बिर)
ए डिभिजन टोलीहरुको सहभागिता रहेको बर्षको पहिलो प्रतियोगितामा निर्धारित ८० मिनेटको खेलमा दुवैले १–१ को बराबरी खेलेका थिए । १–० ले पछि परेको खेलमा पुनरागमन गर्दै सेनाले अघिल्लो चरणको यात्रा तय गरेको हो ।
एलेक्सको गोलबाट हिमालयनले पहिलो हाफको इन्जुरी समयको पहिलो मिनेटमा गोल गरेका थिए । जर्ज प्रिन्स कार्कीले ७० औं मिनेटमा बराबरी गोल गरेपछि आर्मी खेलमा फर्केको थियो । आर्मीका गोलकिपर विकेश कुथु स्पोन्सर म्यान अफ दी म्याच घोषित भएका थिए ।
प्रतियोगिताको बुधबार हुने पहिलो सेमिफाइनलमा नेपाल पुलिस र सिएमजी क्लब संकटाबीच प्रतिस्पर्धा हुनेछ । विशाल स्मृति प्रतिष्ठानले आयोजना गरेको प्रतियोगिताको विजेताले ५ लाख रुपैयाँ प्राप्त गर्नेछ ।
विशाल स्मृति गोल्डकपमा मंगलबार खेल
नेपाल पुलिसविरुद्ध संकटा
