वीरगंज (हाम्रो खेलकुद) – सीएमजी क्लब संकटा प्रथम विशाल मेमोरियल कप फुटबल प्रतियोगिताको फाइनलमा प्रवेश गरेको छ।
आज भएको सेमिफाइनल खेलमा नेपाल पुलिस क्लबलाई ३-०ले पराजित गर्दै संकटा फाइनलमा पुगेको हो। संकटाको जितमा विदेशी खेलाडी अजायी मार्टिन्सले २ गोल गरेका थिए भने राज पौडेलले १ गोल गरे।
खेलको १७औं मिनेटमा मार्टिन्सले गोल गर्दै संकटालाई अग्रता दिलाएका थिए। खेलको ३०औं मिनेटमा पुलिसका बुद्ध लामाले रातो कार्ड खादैं मैदान छाडेका थिए दोश्रो हाफको सुरुवातमै संकटा पुलिसमाथि हावी भएको थियो।
४८औं मिनेटमा मार्टिन्सले संकटाका लागि दोश्रो गोल गरे भने त्यसको ४ मिनेट पछि राज पौडेलले संकटालाई ३-०ले अगाडी बढाएका थिए।
गतवर्ष ७ वटा नकआउट प्रतियोगिताको फाइनल यात्रा तय गरेको संकटाले ३ उपाधि जितेको थियो। यस वर्षको पहिलो प्रतियोगितामै संकटा फाइनल पुगेको हो। विशाल स्मृति प्रतिष्ठानले आयोजना गरेको प्रतियोगिताको विजेताले ५ लाख रुपैयाँ प्राप्त गर्नेछ ।
विशाल स्मृति गोल्डकपमा बिहिबारको खेल
नव जना जागृति विरुद्ध त्रिभुवन आर्मी
