वीरगंज (हाम्रो खेलकुद) – त्रिभुवन आर्मी क्लबले नव जन जागृति फुटबल क्लबलाई ३-०ले पराजित गर्दै प्रथम विशाल मेमोरियल कप फुटबल प्रतियोगिताको फाइनलमा स्थान बनाएको छ।
बिहिबार भएको दोश्रो सेमिफाइनल खेलमा आर्मीले खेलको २२औं मिनेटमा जर्ज प्रिन्स कार्कीको गोलले अग्रता बनाएको थियो। खेलको अन्त्यतिर कप्तान भरत खवासले २ गोल थपेपछि आर्मीले फाइनलमा स्थान पक्का गरेको हो।
खवासले खेलको ८०औं मिनेट र ८८औं मिनेटमा गोल गरेका थिए। २ गोल गरेर टोलीलाई जित दिलाएका आर्मीका कप्तान खेलको स्पोन्सर म्यान अफ द म्याच भए।
आर्मीले शनिबार हुने फाइनल खेलमा उपाधिका लागि सीएमजी क्लब संकटाको सामना गर्नेछ। संकटाले हिजो भएको सेमिफाइनल खेलमा नेपाल पुलिस क्लबलाई ३-०ले पराजित गरेको थियो।
विशाल स्मृति प्रतिष्ठानले आयोजना गरेको प्रतियोगिताको विजेताले ५ लाख रुपैयाँ प्राप्त गर्नेछ।
विशाल स्मृति गोल्डकपमा शनिबार हुने फाइनल खेल
सिएमजी क्लब संकटा विरुद्ध त्रिभुवन आर्मी
