एजेन्सी – इङ्गलिस क्लब टोटेनहम हट्स्परका प्रशिक्षक मौरीसियो पोचेटिनो र खेलाडी ह्युङ्ग मिन सनले अप्रिल महिनाको उत्कृष्ट प्रशिक्षक र खेलाडीको उपाधि जितेका छन्।
अप्रिल महिनामा टोटेनहमले लगातार ६ खेलमा जित दर्ता गरेको थियो। यो पोचेटिनोको यस सिजनको पहिलो व्यक्तिगत उपाधि हो। स्पर्सले ६ खेलमा १६ गोल गर्दै जम्मा १ गोल खाएको थियो। पोचेटिनोले पछिल्लो पटक फेब्रुअरी २०१६मा यहि उपाधि हात पारेका थिए।
यसैगरी, टोटेनहमकै विङ्गर सनले पनि उत्कृष्ट खेलाडीको उपाधि हात पारे। उनको यो सिजनको दोश्रो उपाधि हो। पछिल्लोपटक उनले सेप्टेम्बर महिनामा यो उपाधि जितेका थिए। उनले अप्रिल महिनामा ५ गोल गरेका थिए।
अप्रिल महिनाको उत्कृष्ट गोलको उपाधि भने चेल्सीका पेड्रो रोड्रीग्वेजले जिते। उनले एभर्टनविरुद्ध ३-०को जित दर्ता गर्दा प्रहार गरेको दर्शनीय गोलले उपाधि जितेको हो।
