बार्सिलोना (एजेन्सी) – स्पेनिस ला लिगामा रियल म्याड्रिड भन्दा ३ अंकले पछि पर्दै उपाधिबाट बन्चित बार्सिलोनाले कोपा डेल रे जितेमा विजयी उत्सव नमनाउने भएको छ ।
बार्सिलोनाका निर्देशकहरुले घरेलु कप जितेपनि शहरमा कुनै उत्सव नमनाउने निर्णय गरेका हुन् । च्याम्पियन्स लिगमा युभेन्टससँग पराजित बार्सिलोना ला लिगाको उपाधिमा पनि चुकेको थियो । २०११ र २०१२ को सिजनमा लिग र युरोपियन उपाधिबाट चुकेपनि कोपा डेल रे जित्दा बार्सिलोनाले भव्य विजयी उत्सव मनाएको थियो । तर यो सिजन त्यस्तो नहुने बार्सिलोनाका निर्देशकहरुले निर्णय गरेका छन् ।
बार्सिलोनाले मे २८ मा कोपा डेल रे को फाइनलमा अलभेसको सामना गर्दैछ । सिजन को अन्त्यमा बार्सिलोनासँग सम्झौता नविकरण नगर्ने निर्णय गरेका प्रशिक्षक लुइस एन्रिकेको त्यो बार्सिलोनासँगको अन्तिम खेल हुनेछ ।
