काठमाडौं (हाम्रो खेलकुद) – मध्यपुर युथ एसोसिएसनले होम एण्ड अवे पद्दतिको आधारमा पहिलोपटक ग्रासरुट फुटबल लिग आयोजना गर्ने भएको छ । होम एण्ड अवे ग्रासरुट फुटबल लिग मध्यपुर युथ एसोसिएसनको खेलमैदानमा जेठ १३ गते शनिबारबाट शुरु हुदैछ ।
आयोजक मध्यपुरले बिहिबार पत्रकार सम्मेलनको आयोजना गर्दै सबै बालबालिकासबैहरुले धेरैभन्दा धेरै फुटबल खेलोस भन्नै उद्देश्यले पहिलोपटक यस्तो खालको प्रतियोगिता आयोजना गर्न लागिएको बताए । ‘अहिले एन्फा एकेडेमीले ग्रासरुटको कार्यक्रम गर्दै आएको छ । हामीले पनि ग्रासरुटको कार्यक्रमलाई एक वर्ष अघिबाट निरन्तरता दिएका छौं ।’ एसोसिएसनका अध्यक्ष उपेन्द्रमान सिंहले भने, ‘फुटबललाई बिकास गर्ने हो भने अब पनि एन्फाको मात्रै भर पर्नुहुदैन भनेर नै हामीले दीर्घकालीन रुपमा लिग गर्ने गरी होम अवे लिगको थालनी गरेका हौं ।’ यस्तै अध्यक्ष सिंहले अरु जिल्ला र क्लबहरुले यस्तै खालको लिग आयोजना गर्न आग्रह गरे । लिग दौरान खेलाडी घाइते भए क्लबले एक लाखसम्म बेहोर्ने र त्यसभन्दा माथि भने अभिभावक र स्कुलले उपचार खर्च बेहोर्नुपर्ने अध्यक्ष उपेन्द्रमान सिंहले बताए । प्रतियोगिता दुई विधामा हुनेछ ।
प्रतियोगितामा ८ देखि १० वर्ष र ११ वर्षदेखि १३ वर्षसम्मको गरी दुई समूह बनाइएको छ । दुवै उमेर समुहमा १६ टिमको सहभागिता रहेको छ । करिव ८ महिना सम्म चल्ने प्रतियोगितामा विभिन्न १६ एकेडेमी र स्कुलले सहभागिता जनाएको छ । लिगका खेलहरु हरेक शनिबार हुनेछ । होम अवे लिगमा ३० खेल हुनेछ । लिगमा एकै दिन १६ खेल हुनेछ ।
सहभागी स्कुलहरु:
१. मध्यपुर युथ एसोसिएसन २.एभेरेष्ट इंग्लिस एकेडेमी ३.ग्रासरुट फुटबल एकेडेमी ४. आदर्श जनप्रेमी उच्च माध्यमिक विद्यालय ५.नेक्सस इन्टरनेशनल एकेडेमी ६. भक्तपुर इंग्लिस स्कुल ७. राजश्री गुरुकुल स्कुल ८.विनायक शिक्षा निकेतन स्कुल ९.ग्ल्याड स्कुल एकेडेमी १०. गोल्डेन सुनगाभा इंग्लिस स्कुल ११.नौलो सुनगाभा इंग्लिस स्कुल १२. मेरी गोल्ड इंग्लिस स्कुल १३. सिभिएम स्कुल १४. भक्तपुर निष्ट स्कुल १५. एक्टिभ इंग्लिस स्कुल १६. ओम ज्ञान मन्दिर स्कुल
