काठमाडौँ (हाम्रो खेलकुद) – लुइस इनरिकेले बार्सिलोनामा तीन बर्षको सफल कार्यकालको अन्त्य गरेसँगै विश्वकै सबैभन्दा चर्चित क्लब मध्येको एकलाई कसले सम्हाल्छ भन्नेमा फुटबल समर्थकबीच कतुहलता थियो ।

केहि समय अघि देखि बार्सिलोनासँग नाम जोडिएका अर्नेस्टो भालभर्देलाई सोमबार नयाँ प्रशिक्षकको रुपमा सार्वजनिक गरेपछि समर्थकको कतुहलताको अन्त्य भएको छ । उनले बार्सिलोनासँग दुई बर्षको सम्झौता गरेका छन् ।

बार्सिलोनालाई सम्हाल्नु अघि भालभर्देले ला लिगाको अर्कोे टोली एथलेटिक बिल्बावोलाई प्रशिक्षण दिएका थिए । एकसाता अघि भालभर्देले बिल्बावोसँगको सम्झौता नविकरण नगर्ने बताएका थिए ।

खेल जीवनमा फरवार्डको रुपमा खेलेका ५३ बर्षे भालभर्देले बार्सिलोनामा दुई सिजन बिताएका थिए । उनले बार्सिलोनाबाट कोपा डेल रे जितेका थिए । उनले क्लबका लागि २२ खेलमा ८ गोल गोल समेत गरेका थिए । बार्सिलोनाबाट एथलेटिक बिल्बावो पुगेर उनले त्यहाँ ६ बर्ष खेलेका थिए ।

खेलाडी जीवनको लामो समय बिल्बावोमा बिताएका भालभर्देलाई प्रशिक्षणमा पहिलो मौका सोही क्लबले दिएको थियो । झन्डै ४ वर्ष बिल्बावोको युवा टोली सम्हालेका भालभर्दे सन् २००१ मा सिनियर टोलीको सहायक प्रशिक्षब नेका थिए । त्यसपछि एक सिजन बिल्बाओको ‘बी’ टोली सम्हालेका उनी २००३ मा सिनियर टोलीको मुख्य प्रशिक्षक नियुक्त भएका थिए ।

भालभर्देले इस्प्यानोल , भ्यालेन्सिया , भिल्लारियल र ओलाम्पियाकसलाई पनि प्रशिक्षण दिइसकेका छन् । उनले ओलाम्पियाकससँग तिन पटक ग्रिस फुटबल सुपरलिग तथा २ पटक गरिक फुटबल कप जितेका थिए । उनले २०१५ मा बिल्बावोलाई स्पेनिस सुपर कपको उपाधि दिलाएका थिए ।

सफलताको हिसाबले कतिपय विश्लेषक र समर्थकले उनलाई बार्सिलोनाको प्रशिक्षणका लागि योग्य नभएको टिप्पणी गरेका छन् । यद्दपी ला लिगामा उनको अनुभव २४ पटकको लिग बिजेता बार्सिलोनालाई महत्वपूर्ण हुने अनुमान गर्ने पनि त्यत्तिकै छन् ।

–एजेन्सीको सहयोगमा