काठमाडौं (हाम्रो खेलकुद)– रुस्लान थ्री स्टार क्लबका पूर्व प्रशिक्षक प्रदीप हुमागाईले प्रशिक्षण दिदै आएको अमेरिका, पेन्सेलभेनियाको किस्टोन एथलेटिक यू १८ टोलीले पोकोनो कप फुटबल प्रतियोगिता जितेको छ । हुमागाईका अनुसार अमेरिका फुटबल संघअन्तर्गत रहेको स्टेट डेभलप्मेन्ट प्रोग्रामले आयोजना गरेको पूर्वी क्षेत्रका राज्यबाट छनोट भएका टोलीबीच पोनोको कपमा अन्तिम प्रतिस्पर्धा भएको थियो ।

हुमागाईको टोली अन्तिम चरणका सबै चार खेल जितेर च्याम्पियन बनेको थियो । किस्टोनेले पेन्सेलभेनियाको एफसी पेन्सेलभेनियालाई ४–१ ले न्यू जर्सीको युएस पार्मा रोयललाई ६–० ले, न्यू योर्क इस्टलाई इन्टरस्टार एफसी गालासटिकोसलाई १–० र न्यू योर्कको रक ल्यान्ड फुसनलाई २–१ ले हराएको थियो ।

प्रतियोगिता अमेरिकाको स्मारक दिवसको अवसरमा मे २७ र २८ तारिकमा प्लिसेन्ट भ्याली पेन्सेलभेनियामा भएको थियो । टोलीलाई जिताउँन सफल भएकोमा स्भाविक खुसी लागेको जनाउँदै अमेरिकाबाट हुमागाईले हाम्रो खेलकुद डटकमलाई भने,‘ जहाँ भएपनि फुटबलबाट टाढा रहन सक्दिन । यहाँ आएदेखि नै क्लबमा आबद्ध छु । आफुले प्रशिक्षण दिएको टोलीले सफलता प्राप्त गर्दा गर्व लाग्छ ।’ नेपालमा रहँदा हुमागाईले २०६९ मा थ्री स्टार क्लबलाई लिग च्याम्पियन बनाएका थिए ।

हुमागाई लगायत अन्य प्रशिक्षक रहेको क्लबमा नेपाली राष्ट्रिय टोलीका पूर्व प्रशिक्षक रिचर्ड ओर्लोस्की टेक्निकल डाइरेक्टरका रुपमा कार्यरत छन् । हुमागाईले अहिले किस्टोनमा यू १८ सँगै यू १४ लाई पनि प्रशिक्षण दिदै आएका छन् । हुमागाईका अनुसार पोकोनो कप विजेता टोलीले जुन १० र ११ मा न्यू जर्सीमा हुने प्रतियोगितामा प्रतिस्पर्धा गर्नेछ ।