स्याङजा (हाम्रो खेलकुद) – मंगलबारदेखि सुरु भएको एन्फा महिला लिग च्याम्पियनसिप २०७४ अन्तर्गत पहिलो दिनको खेलमा रौतहटले पाँचथरलाई १५-०को भारी अन्तरले पराजित गर्दै विजयी सुरुवात गरेको छ।
फोटो: एन्फा
रौतहटको जितमा रजनी ठोकर र रश्मि कुमारी घिसिङले ह्याट्रिक गरेका थिए भने कप्तान मेनुका नगरकोटे, अन्जली योन्जन र अनिता केसीको २/२ गोलको योगदान रह्यो।
यसैगरि राष्ट्रिय टोलीकी फरवार्ड सावित्रा भण्डारी सम्मिलित स्याङजाले धनकुटालाई १३-०ले पराजित गर्यो। सावित्रा आफैंले घरेलु टोलीका लागि ९ गोल गरेकी थिइन्।
यसैगरी प्रियांका रानाको ६२औं मिनेटको गोलको मद्दतले कन्चनपुरले भोजपुरलाई १-०ले पराजित गर्यो। प्रिती राईले २ गोल गरेपछि काठमाडौँले मकवानपुरलाइ २-०ले पराजित गर्यो।
बाँके र सुनसरीले गोलरहित बराबरी खेल्दा पूर्वेली टोली झापाले भने दाङमाथि ९-०को ठुलो जित हात पार्यो। झापाका लागि सम्झना लावतीले ४ गोल प्रहार गरिन भने मालिका मगरले ह्याट्रिक पुरा गरिन।
