आगामी पौष महिनामा भारतमा आयोजना हुने साफ च्याम्पियनशिपको तयारीका लागि बोलाइएको ४० सदस्यीय टोलीमा जुमानु राई र सन्तोष साहुखल उपस्थित नभएको अवस्थामा नवयुग बाट धेरै आशा गरिएको छ|

भर्खरै सम्पन्न राष्ट्रिय लिगमा १४ गोल गर्दै उच्च गोलकर्ता भएका नवयुग त्रिभुवन आर्मी क्लबबाट व्यावसायिक फुटबल खेल्छन| लिगको सर्वोत्कृष्ट फरवार्ड समेत चुनिएका नवयुगले आर्मीलाई दोश्रो स्थानसम्म पुर्याउन महत्वपूर्ण भूमिका खेले| लिगमा चौध खेल खेलेका नवयुगले दुइ खेलमा ह्याट्रिक गरेका थिए|

यसअघी पनि राष्ट्रिय टोलीमा परेका नवयुगले भर्खरै मात्र पुनेमा भारत विरुद्ध खेलिएको मैत्रीपूर्ण खेलमा डेब्यु गरेका थिए| खेलको अन्तिम २५ मिनेट मात्र खेलेका नवयुगले केहि राम्रो मुभहरु बनाएका थिए| हालै मात्र साफका लागि घोषणा गरिएको ४० सदस्यीय टोलीमा सन्तोष साहुखल र जुमानु राईको नाम नभएको अवस्थामा नवयुगबाट धेरै आशा गरिएको छ|

शारीरिक रुपमा बलिया रहेका नवयुग निकै छरिता छन्| उनले लिगमा गरेको गोल्हारू सबै किसिमका छन्| हेडिंग देखि लामो प्रहार, सबै किसिमको टेक्निकमा निपुण नवयुग भर्खर २५ वर्षका भएका छन्| लिग अवधिभर राम्रो प्रदर्शन गरेका नवयुग प्रशिक्षणका दौरान पनि राम्रो प्रदर्शन गर्न जरुरि छ| आर्मी भएकाले पनि उनको फिटनेस लेभल एकदम राम्रो भएको जिकिर आर्मीका प्रशिक्षक मेघराज केसीले गरेका थिए| भारत खवास र नवयुगको तालमेल आर्मीमा मिलेको देखिएको र सोहि जोडी राष्ट्रिय टोलीमा पनि चल्न सक्ने दाबि धेरै समर्थकहरुको छ|

यसो त राष्ट्रिय टोलीबाट बिगत दश वर्षदेखि खेल्दै आएका राजु तामाङ्गले पनि नवयुग राष्ट्रिय टोलीमा चम्किनेमा आशावादी रहेको बताएका थिए|

के नवयुगले राष्ट्रिय टोलीमा सन्तोष र जुमानुको ठाउँ लिन सक्लान? तल प्रतिक्रिया दिनुहोस