काठमाडौं(हाम्रो खेलकुद) – सिएमजी क्लब संकटाले दोस्रो ललित स्मृति यु–१८ फुटबल प्रतियोगितामा फराकिलो जित निकालेको छ। सातदोबाटोस्थित एन्फा कम्प्लेक्सको खेल मैदानमा बिहीबार भएको खेलमा संकटाले ब्रिगेड व्वाइज क्लबमाथि ८–० को फराकिलो जित निकालेको हो ।

संकटाको जितमा दिपेश आलेमगर एक्लैले चार गोल गरे । रञ्जित गुरुङले दुई तथा लक्ष्मण गुरुङले एक गोल गर्दा संकटाले सुवास गिरिबाट एक गोल उपहार पाएको थियो । एकपक्षीय बनेको खेलको सातौं मिनेटमा पहिलो गोल गरेको दिपेशले ४८ औं मिनेटमा हृयाट्रिक गरेका थिए । उनले ७७औं मिनेटमा चौथो गोल गरेको थिए। रञ्जित गुरुङले १३ र २१ औं मिनेटमा गोल गरे । लक्ष्मण गुरुङले खेल सकिन एक मिनेट बाँकी रहँदा गोल गर्दा ५१ औं मिनेटमा संकटाले आत्मघाती गोल उपहार पाएको थियो ।

जितपछि समूह ‘डी’ मा ६ अंक जोडेको संकटा क्वार्टरफाइनल नजिक पुगेको छ । समूह ‘डी’ मा पुलिस तीन अंकसहित दोस्रो स्थानमा रहँदा ब्रिगेड र मोरङ अंकविहीन छ ।

यस्तै प्रतियोगिताको अर्काे खेलमा जगदम्बा लुम्विनी फुटबल क्लबले लगातार दोस्रो जित निकालेको छ । हिमालयन शेर्पा क्लबलाई २–० ले पराजित गर्दै लुम्विनीले प्रतियोगितामा लगातार दोस्रो जित निकालेको हो । जितसँगै लुम्बिनीले समूह ‘सी’ मा ६ अंक जोड्दै क्वार्टरफाइनल पुग्ने सम्भावना बलियो बनाएको छ । लुम्बिनीको जितमा प्रिनस र अमृत गुरुङले गोल गरे । लुम्बिनीले सुरुवाती १० मिनेट धित्र नै २ गोल गरेको थियो।

प्रतियोगिताअन्तर्गत शुक्रबार पनि दुई खेल हुदैछ । पहिलो खेलमा च्यासलले नेपाल एपीएफ क्लबको सामना गर्दा दोस्रो खेलमा सुदुरले फ्रेन्डस् क्लबको सामना गर्नेछ ।