काठमाडौँ (हाम्रो खेलकुद) – एसियन कपको छनोट चरणका खेलको तयारीका लागि नेपाल र भारतबीच आज साँझ मैत्रीपूर्ण खेल हुँदैछ। मुम्बईस्थित अँधेरी स्पोर्ट्स कम्प्लेक्सको मैदानमा हुने खेलका लागि सम्पूर्ण तयारी पुरा भएको छ। नेपालको फिफा वरियता १ सय ६९ छ भने भारत १ सयौं स्थानमा रहेको छ।
नेपाल आफ्नो पछिल्लो अन्तर्राष्ट्रिय खेलमा फिलिपिन्ससँग ४-१ले पराजित भएको थियो भने भारतले म्यानमारलाई उसकै घरेलु मैदानमा १-०ले पराजित गरेको थियो। नेपालका लागि विशाल राइले फिलिपिन्सविरुद्ध गोल गरेका थिए भने भारतका लागि सुनिल क्षेत्रीले ९०औं मिनेटमा निर्णायक गोल गरेका थिए। सुनिल आजको खेलमा उपस्थित हुने छैनन्।
यसैगरी नेपाल र भारतबिचको पछिल्लो अन्तर्राष्ट्रिय खेलमा भारत ४-१ले विजयी भएको थियो। सन २०१५को डिसेम्बर महिनामा साफ च्याम्पियनसिपमा भएको खेलमा नेपालले बिमल घर्ति मगरको गोलमा अग्रता लिएपनि ४ गोल खाएको थियो।
नेपाल र भारतले अहिलेसम्म कुल १७ अन्तर्राष्ट्रिय खेल खेलेका छन्। जसमा नेपालले १ खेल जितेको छ भने भारतले १२ ओटामा जित दर्ता गरेको छ। ४ खेल भने बराबरीमा समाप्त भएका छन्। यस दौरान भारतले ३१ गोल गर्दा नेपालले ७ गोल मात्र फर्काएको छ।
