काठमाडौं (हाम्रो खेलकुद)– टोखा नगरपालिकाले प्रथम नगर कप नकआउट फुटबल प्रतियोगिताको उपाधि जितेको छ । त्रिपुरेश्वरस्थित दशरथ रंगशालामा आइतबार भएको फाइनलमा टोखाले चन्द्रागिरी नगरपालिकालाई ५–३ गोलअन्तरले पराजित गर्यो ।

टोखाले ३–० ले पछि परेको स्थितिलाई उल्ट्याउदै उपाधि जितेको हो । टोखाले ५ गोल गर्दै दोसे हाफमा गरेको हो । टोखाका लागि त्रिलोक दुराले २, आशिर्ष डंगोल , अनिल थापा र विजय श्रेष्ठले १/१ गोल गरे । चन्द्रागिरीका रुजित पुडासैनीले ह्याट्रिक गरेक ाथिए । रुजित प्रतियोगिताकै सर्वोत्कृष्ट खेलाडी चुनिए र १० हजार नगद रुपैयाँ प्राप्त गरे ।

काठमाडौं जिल्ला खेलकुद विकास समितिको व्यवस्थापनमा जिल्ला समन्वय समिति, काठमाडौंद्वारा आयोजित प्रतियोगितामा कीर्तिपुर नगरपालिकाले तेश्रो स्थान हासिल गर्यो । कीर्तिपुरले नागार्जुन नगरपालिकालाई २–० ले हरायो ।टोखाले उपाधिसहित १ लाख ११ हजार १ सय ११ रुपैयाँ प्राप्त गर्यो । चन्द्रागिरीले ५१ हजार १ सय ५१ र नागर्जुनले २५ हजार १ सय ५१ रुपैयाँ प्राप्त गर्यो ।

खेलाडीको विधागत उत्कृष्टतर्फ सबै उपाधि टोखाले जित्यो । नवीन श्रेष्ठ उत्कृष्ट गोलकिपर, गोविन्द रिमाल उत्कृष्ट रक्षक,साजन डंगोल उत्कृष्ट मिडफिल्ड, आशिष डंगोल उत्कृष्ट फरववार्ड चुनिए । चन्द्रागिरीका रमेश बुढाथोकी उत्कृष्ट प्रशिक्षक चुनिए । उत्कृष्ट सबैले समान ५ हजार रुपैयाँ पाए । कीर्तिपुरले अनुशासित टिमको उपाधि प्राप्त गर्यो ।

राष्ट्रिय खेलकुद परिषद्का सदस्य–सचिव केशवकुमार विष्ट, काठमाडौं जिल्ला खेलकुद विकास समितिका अध्यक्ष ध्रुवराज न्यौपाने र उपाध्यक्ष दामोदर भट्टराई, आयोजक जिल्ला समन्वय समितिका स्थानिय विकास अधिकारी गोपाल अधिकारीलगायतले विजेता उपविजेता टोलीका खेलाडीलाई पुरस्कृत गरियो । जेठ २३ देखि सुरु प्रतियोगितामा काठमाडौंका १० नगरपालिका सहभागी थिए ।

सोही अवसरमा गत बर्ष पूर्वाञ्चलमा भएको सातौं राष्ट्रिय खेलकुदका पदक विजेता काठमाडौंका खेलाडी र प्रशिक्षकलाई नगदसहित सम्मान गरिएको थियो ।