काठमाडौँ (हाम्रो खेलकुद) – एएफसी एसियन कप २०१९को छनोट अन्तर्गत समूह चरणको दोश्रो खेलमा नेपालले मंगलबार यमनको सामना गर्दैछ। उक्त खेलका लागि नेपालले २३ सदस्यीय टोलीको छनोट सोमबार सार्वजनिक गरेको छ।
भारतसँगको मैत्रीपूर्ण खेलमा सहभागी रहेका २० खेलाडीमध्य ३ खेलाडी टोलीमा समावेश रहेका छैनन् भने ६ खेलाडीलाई टोलीमा बोलाइएको छ। पछिल्लो खेलमा टोलीमा रहेका गोलरक्षक विशाल श्रेष्ठ, डिफेन्डर बिमल बस्नेत र मिडफिल्डर सुमन लामा टोलीमा अटाएनन्।
पछिल्लो २ खेलमा टोलीमा नअटाएका फरवार्ड अनिल गुरुङ टोलीमा फर्किएका छन् भने राजेन्द्र रावलको पनि पुनरागमन भएको छ। दिनेश राजवंशी, एलन न्यौपाने, मान बहादुर तामाङ र सुनिल बल पनि राष्ट्रिय टोलीमा फकिएका छन्।
