दिपेन्द्र पोखरेल

काठमाडौँ – नेपालले मंगलबार एएफसी एसियन कप २०१९को छनोट चरण अन्तर्गतको दोस्रो खेल घरेलु मैदानमा खेल्दा लेफ्ट ब्याक रविन श्रेष्ठ मैदान बाहिरबाट नेपालको समर्थन गर्दै हुनेछन्।

फाइल तस्बिर

छनोट चरणको पहिलो खेल खेल्दा मनिलामा फिलिपिन्सविरुद्ध घुडाँमा चोट बोकेका रविन शल्यक्रिया पछि विश्राममा छन्। मैदानमा फर्किन अझै कम्तिमा ६ देखि ७ महिना लाग्ने हुदा राष्ट्रिय टोलीमा रबिनको अनुभव खड्किने पक्का छ ।

राष्ट्रिय टोलीका प्रशिक्षक ग्योतोकु कोजीले पनि नेपाललाई फुल ब्याकमा समस्या पर्ने बताईसकेका छन् । “नेपाललाई अन्य पोजिसनमा धेरै विकल्प भएपनि फुल ब्याकमा भने त्यति सहज छैन । यसै नेपालमा कम खेलाडी रहेको यस पोजिसनमा रबिनजस्ता खेलाडी नहुनु टोलीलाई ठुलो दुर्भाग्य हो।”  कोजीले रविनसँगै मिडफिल्डर बिक्रम लामाको अनुपस्थितिका बारे खेल अघिको पत्रकार सम्मेलनमा टोलीलाई गार्हो पर्ने बताए।

भारतसँगको पराजय पछि प्रशिक्षक कोजीले यसअघि नै डिफेन्स नेपालको समस्या रहेको बताउदै हरेक दिन त्यसको सुधारमा अभ्यास गर्दै आएको बताएका छन् । “हामीसँग २ खेलाडी उपलब्ध नहुनाले धेरै गार्हो छ। तर हामीले हामीसँग रहेका खेलाडीहरुबाट प्रशिक्षणमा मेहेनत गरेका छौँ।”

त्यस्तै कप्तान बिराज महर्जनले पनि भारतविरुद्ध नेपाली डिफेन्समा तालमेल नमिलेको बताएका थिए । डिफेन्समा नयाँ समीकरणको समावेशसँगै तालमेलमा कमजोरी देखिएको बिराजले स्वीकारेका हुन्।

नेपालले भारतलाई पछिल्लो पटक हराउँदा दशरथ रंगशालामा रविनको क्रसमा जुमानु राइले गोल गरेका थिए । साफ च्याम्पियनसिप २०१३मा नेपालले सेमिफाइनलसम्म यात्रा गर्दा रविन प्रतियोगिताकै उत्कृष्ट खेलाडी घोषित भएका थिए। नेपालले बंगबन्धु गोल्ड कप र एएफसी सोलिडारिटी कप जित्दा रविन टोलीका महत्त्वपूर्ण सदस्य रहेका थिए।

नेपालले हाल निकै महत्वपूर्ण प्रतियोगिता खेल्दै गर्दा आफुले कुनै योगदान दिन नपाऊँदा रविन दुखी रहेको बताउछन । “नेपालले खेलेको हरेक खेलमा मेरो समर्थन हुन्छ, तर आफुले खेलेर केहि योगदान दिन नपाउँदा म निकै निराश छु ” , रविन बताउछन ।

यमनलाई चुनौती दिन नेपालले डिफेन्समा सुधार गर्नुपर्ने रविनको बुझाइ छ । “भारतसँगको खेलमा नेपाली डिफेन्स कम्प्याक्ट देखिएन । भारतले सहजै स्पेस बनाउदै थियो र नेपाली डिफेन्स वन भर्सेस वनमा चुकेको थियो । यसलाई सुधारे नेपालले यमनलाई कडा चुनौती दिनेछ ” , रविनले थपे ।