सुबास हुमागाईं

काठमाडौँ  – एएफसी एसियन कप अन्तर्गत यमनविरुद्धको खेलमा वैकल्पिक खेलाडीका रुपमा मैदान प्रवेश गर्दै देवेन्द्र तामाङले राष्ट्रिय टोलीबाट डेब्यु गरेका छन्। दोश्रो हाफमा आदित्य चौधरीलाई स्थानान्तरण गर्दै मैदान प्रवेश गरेका देवेन्द्र विगतका समयमा टोलीको सदस्य रहेपनि मैदानमा उत्रिन भने पाएका थिएनन्।

यमनविरुद्धको खेलमा ७३औं मिनेटमा मैदान प्रवेश गरेका उनले टोलीको गोलरहित बराबरीमा सहयोग गरेका थिए। नेपालले एएफसी सोलिडारिटी कप जित्दा टोलीका सदस्य रहेका देवेन्द्रले विगतमा राष्ट्रिय टोलीमा परेका थिएनन्।

राष्ट्रिय टोलीमा डेब्यु गरेपछि हर्षित हुँदै देवेन्द्रले आफ्नो मेहेनतको फल पाएको बताए। “मलाई आज खेल्न पाउँछु जस्तो लागेको थिएन। तर प्रशिक्षकले मौका दिएपछि मैले डेब्यु गर्ने मौका पाएँ। खेल पनि राम्रै रह्यो। आफ्नो मेहेनतको फल प्राप्त भएकोमा एकदम खुसि लागेको छ।”

उनले यस सुरुवातलाई अझ आउने दिनमा राम्रो गर्दै लग्ने बताए। “आज पहिलो खेल खेल्न पाउँदा एकदम खुसि लागेको छ। तर मेरो करियर भर्खर सुरु भएको छ। अझै मेहेनत गर्दै मौका पाएको बेलामा आफुलाई सिद्ध गर्दै लैजाने अठोट लिएको छु”

सन् २०१५को साफ च्याम्पियनसिपमा प्रारम्भिक छनोट पार गरेर अन्तिम छनोटमा पर्नु केहि दिन अगाडी उनि चोटग्रस्त भएका थिए। बेल्जियन प्रशिक्षक प्याट्रिक अजेम्सले उनलाई प्रशिक्षणका दौरान निकै राम्रो रहेको बताएका थिए। बंगबंधु गोल्डकपमा पनि उनलाई चोटका कारण देखाउँदै टोलीमा समावेश गरिएको थिएन।

२४ वर्षीय देवेन्द्रले मनाङ मर्स्याङ्दीबाट खेल्दै आएका छन्। राष्ट्रिय लिगमा झापा एघारबाट खेलेका उनले प्रतियोगिताको उत्कृष्ट डिफेन्डरको उपाधि पनि जितेका थिए। थ्री स्टार क्लबले गत वर्ष एएफसी कपमा दोश्रो चरण प्रवेश गर्दा उनि टोलीका महत्त्वपूर्ण सदस्य रहेका थिए।