काठमाडौँ (हाम्रो खेलकुद) – एएफसी यू-२३ च्याम्पियनसिपलको छनोट चरण खेल्न युएई जाने नेपाली यू-२३ टोलीको प्रशिक्षणको जिम्मा मेघराज केसीले पाएका छन्। राष्ट्रिय टोलीको सहायक प्रशिक्षक रहिसकेका केसी हाल थ्री स्टार क्लबका प्रशिक्षक थिए। यू-२३ टोलीमा केसीलाई धनुषा जिल्लाका प्रशिक्षक प्रकाश अर्यालले सहायक प्रशिक्षकको रुपमा सहयोग गर्नेछन्।
पछिल्लो पटक त्रिभुवन आर्मी क्लबले राष्ट्रिय लिगमा दोश्रो स्थान हात पार्दा उनि मुख्य प्रशिक्षक रहेका थिए। त्यसपछि थ्रीस्टार क्लब आइपुगेका केसीले एएफसी कपको छनोटमा थ्री स्टारलाई दोश्रो चरणमा पुर्याएका थिए। तर एन्फाको लापरवाहीले थ्री स्टारले दोश्रो चरण खेल्न नपाएसँगै थ्री स्टारले कुनैपनि घरेलु प्रतियोगितामा सहभागिता जनाएन।
सन् २०११-१२ ताका ग्राहम रोबर्ट्स नेपाली राष्ट्रिय टोलीको मुख्य प्रशिक्षक रहँदा मेघराज केसी टोलीको सहायक प्रशिक्षकका रुपमा कार्यरत थिए।
हाल जेएफएको इन्स्ट्रकटर कोर्षका लागि जापान पुगेका केसी नेपाल फर्किएपछि टोलीको प्रशिक्षण सम्हाल्नेछन्।
