एजेन्सी – एसी मिलान एवं इटालियन राष्ट्रिय टोलीका १८ वर्षीय गोलरक्षक जियानलुइजी डोनारुम्माले नयाँ करार नगर्ने भएसँगै क्लब छाड्ने निश्चित भएको छ।
सन् २०१८ सम्मका लागि एसी मिलानमा आवद्ध रहेका डोनारुम्मालाई क्लबले निकै ठुलो प्रस्ताव गरेपनि उनलो सो प्रस्तावलाई अस्विकार गर्दै क्लब छाड्ने निर्णय लिएका हुन्। उनले १६ वर्षको उमेरमा डेब्यु गरेदेखि मिलानबाट ६८ खेल खेलिसकेका छन्। राष्ट्रिय टोलीबाट ४ पटक पोष्ट सम्हालेका डोनारुम्मालाई युरोपका ठुला क्लबहरुले भित्र्याउन चाहेका छन्।
क्लबका निर्देशक मार्को फस्सोनेले डोनारुम्माको यस निर्णयले एसी मिलान आश्चर्यमा परेको जनाएका छन्। “हामीलाई दुख लागेको छ। उनको एजेन्ट मिनो रायोलाले हामीलाई यो अन्तिम निर्णय रहेको बताए। हामीले आफ्नो तर्फबाट सक्दो प्रयास गर्यौं तर खेलाडीले बस्ने चाह देखाएनन्। हामी दुखी छौं तर क्लब यहिं अडेर बस्दैन। विकल्प खेज्ने क्रम सुरु भइसकेको छ।”
डोनारुम्मालाई अनुबन्धन गर्न रियल म्याड्रिड, म्यानचेस्टर युनाइटेड, पिएसजी र युभेन्टस अग्रपंक्तीमा रहेका छन्। म्याड्रिडले डोनारुम्मालाई क्लबमा भित्र्याउन नाभासलाई मिलान पठाउने योजना बुन्दै छ भने युनाइटेड डे हेयालाई म्याड्रिड पठाएर उनलाई ल्याउने सोचमा छ।
मिलानले डोनारुम्मालाई ठुलो रकमको प्रस्ताव आए मात्र बेच्ने छ। उनको मिलानसँग करारको यो अन्तिम सिजन हो।
