काठमाडौँ (हाम्रो खेलकुद) – असार महिनाको अन्तिम साताबाट सुरु हुने एएफसी यू-२३ च्याम्पियनसिपको छनोट चरणका खेलका लागि अझै प्रशिक्षकको टुङ्गो लागेको छैन।
एन्फाले मेघराज केसीले टोलीको प्रशिक्षण सम्हाल्ने बताएपनि समयअभावका कारण देखाउँदै प्रशिक्षक केसीले टोलीको प्रशिक्षणको जिम्मेवारी नलिने भएका छन्। हिजोमात्र जापानबाट जेएफए इन्स्ट्रकटर कोर्ष गरेर नेपाल आइपुगेका केसीले आज एन्फामा बसेको मिटिङमा आफुले टोलीलाई समय दिन नसक्ने बताएका थिए। उनको अनुपस्थितिमा राजु काजी शाक्यले टोलीको प्रशिक्षणमा सहयोग गर्दै आएका थिए।
एन्फाका सीइओ इन्द्रमान तुलाधरले प्रशिक्षक केसी उपलब्ध नहुने भएपछि अब प्रशिक्षणको जिम्मेवारी राजु काजी शाक्यलाई नै प्रशिक्षणको जिम्मा लिन आग्रह गर्ने बताए। यदि प्रशिक्षक शाक्यले पछि हटेको खण्डमा भने राष्ट्रिय टोलीका प्रशिक्षक ग्योतोकु कोजीलाई यू-२३को टोली हेर्ने जिम्मा दिइने तुलाधरले जानकारी दिए।
यू-२३ टोलीका लागि ३५ खेलाडीलाई प्रारम्भिक छनोटमा बोलाइएको छ। सहायक प्रशिक्षकका रुपमा प्रकाश अर्यालले जिम्मेवारी सम्हाल्नेछन् भने टोलीका व्यवस्थापक एन्फाका सहायक महासचिव संजिव मिश्र रहनेछन्।
