पोर्चुगल (एजेन्सी) – रियल म्याड्रिडसँग १० वर्ष बिताएका पोर्चुगेली सेन्टर डिफेन्डर पेपेले आउदो सिजन टर्कीको सुपर लिगमा बिताउने सम्भावना देखिएको छ। रियल म्याड्रिडसँग सम्झौता समाप्त भएको र नयाँ करार नपाएकोले पेपेको रियल म्याड्रिड करियर समाप्त भएको हो।
पिएसजीसँग नजिकिएको सम्झौता विफल भएपछि पेपे टर्कीको क्लब बेसिक्टासमा आबद्ध हुने सम्भावना बढेको हो। पिएसजीसँग मेडिकलसम्म गरेका पेपे र क्लब बिच करारको अवधिमा कुरा नमिलेपछि अन्तिम समयमा सम्झौता हुन सकेन। पेरिसले २ वर्षको करार गर्ने इच्छा देखाएपनि पेपेले कम्तिमा ३ वर्षको सम्झौता हुनुपर्ने माग राखेका थिए।
हाल पोर्चुगलसँग कन्फेडेरेसन कपमा व्यस्त रहेका पेपेले प्रतियोगिताको अन्त्यपछि इस्तानबुल पुगेर बेसिक्टाससँगको सम्झौता गर्ने बुझीएको छ। पेपेले कन्फेडेरेसन कप अन्तर्गत सेमिफाइनल खेल प्रतिबन्धका कारण गुमाएका थिए। उक्त खेलमा पोर्चुगल चिलीसँग पेनाल्टीमा हार्दै उपाधि होडबाट बाहिरिएको थियो।
