बार्सिलोना (एजेन्सी) – अघिल्लो बर्षको मार्चमा गरिएको सम्झौता अनुसार बार्सिलोनाका स्टार नेयमारको ‘रिलिज क्लज‘ स्वतः बढेको छ। यहि जुलाई १ देखि नेयमारको रिलिज क्लजमा २२ मिलियन युरोको वृद्धि भएको हो । यस वृद्धिसँगै नेयमारको रिलिज क्लज २ सय २२ मिलियन युरो पुगेको छ ।
अघिल्लो बर्ष सम्झौता अनुसार अर्को बर्ष नेयमारको रिलिज क्लजमा थप वृद्धि हुदै २ सय ५० मिलियन युरो सम्म पुग्ने छ । पाँच वर्षको सम्झौतामा सुरुको दुइ बर्ष ‘रिलिज क्लज‘ मा रहेको रकम बढ्ने र पछिल्लो ३ बर्ष भने रकम यथावत रहने उल्लेख छ ।
सन् २०१३ मा बार्सिलोनासँग आबद्ध हुदा नेयमारले २०१८ सम्म बार्सिलोनामा बस्ने सम्झौता गरेका थिए । अघिल्लो मार्चमा बार्सिलोनासँग नयाँ करार सम्झौता गर्दै उनले २०२१ सम्म आफ्नो भविष्य स्पेनिस क्लबमा समर्पित गरेका थिए ।
गत सिजन कोपा डेल रे उपाधिमा चित्त बुझाउनु परेको बार्सिलोनामा यस सिजन नयाँ प्रशिक्षक आएका छन् । नेयमार, मेस्सी र सुआरेजको जोडीले गत सिजन राम्रो प्रदर्शन गरेपनि क्लबलाई उपाधि भित्र्याउन भने गाह्रो पारेको थियो । यस सिजन जेरार्ड डेउलेफेउ पनि क्लबमा फर्किएका छन् भने बार्सिलोना अझैपनि ट्रान्सफर बजारमा खेलाडी खोज्ने प्रयासमा छ ।
