एजेन्सी – पोर्चुगलका कप्तान एवं रियल म्याड्रिडका स्टार फरवार्ड क्रिस्टियानो रोनाल्डोले अर्को साता औपचारिक वक्तब्य जारी गर्दै आफ्नो भविष्यबारे जानकारी दिने भएका छन्।
रियल म्याड्रिडले रोनाल्डोलाई सकेसम्म चाँडो आफ्नो मनासय खुलाउन भनेपछि उनले अर्को साता निर्णय गर्ने द टाइम्स नामक पत्रिकाले जनाएको छ। विगत केहि सातायता रोनाल्डोको रियल म्याड्रिडमा भविष्य अनिश्चित रहेको बुझिएको छ। रियल म्याड्रिडसँग बेखुस देखिएका रोनाल्डोले क्लब छाड्ने मनस्थिति बनाएको विभिन्न पत्रपत्रिकाले लेखेका थिए भने म्याड्रिडका अध्यक्षले पनि रोनाल्डोलाई कन्फेडेरेसन कपपछि भेटेर निधो गर्ने बताएका थिए।
सन् २००९मा म्याड्रिडमा आबद्ध भएयता रोनाल्डो र समर्थकहरुको पनि सम्बन्ध कुनै समय चिसिएको थियो। रोनाल्डोलाई समय समयमा आलोचना गर्दै आएकाले उनले म्याड्रिड छाड्ने मनसाय बनाएका हुन्। उनले टोलीमा सक्दो प्रदर्शन गर्दा पनि नतिजा नआउँदा समर्थकके उनलाई दोषारोपण गर्दथे।
पोर्चुगलसँग कन्फेडेरेसन कपमा रहेका रोनाल्डोलाई जुम्ल्याहा भएपछि चाडैं छुट्टि दिइएको छ। उनि हाल अमेरिकामा आफ्नो बच्चाहरुसंग पारीवारिक समय बिताइरहेका छन्।
