एजेन्सी – लेस्टर सिटिलाई २०१५/१६को प्रिमियर लिग उपाधि जिताउन महत्त्वपूर्ण भूमिका खेलेका अल्जेरियन मिडफिल्डर रियाद माहरेजलाई आर्सनलले अनुबन्धित गर्ने भएको छ।
२६ वर्षीय मिडफिल्डरलाई अघिल्लो सिजन पनि थुप्रै प्रस्ताव आएपनि उनले लेस्टरमै रहने निर्णय लिएका थिए। तर, गत सिजन लेस्टरले राम्रो प्रदर्शन गर्न नसकेपछि प्रशिक्षक क्लाउडियो र्यानेरी बर्खास्तीमा परे। यससँगै माहरेजले पनि लेस्टर छाड्ने संकेत दिंदै आएका थिए।
इटालियन प्रेस क्यल्सियो मर्साटोका अनुसार आर्सनलले लेस्टरलाई ३५ मिलियन पाउण्डको प्रस्ताव स्वीकार भएपछि कल्बले खेलाडीसँग पनि सम्झौता गरिसकेको छ। माहरेजले आर्सनलसँग ४ वर्षको सम्झौता गर्ने भएका छन्।
माहरेजको प्रदर्शनबाट प्रभावित भएर अघिल्लो सिजन बार्सिलोनाले पनि उनीमाथि नजर राखेको थियो। तर, बार्सिलोनाले औपचारिक रुपमा सम्पर्क नराखेपछि माहरेजले आर्सनलमै जाने निर्णय लिएका हुन्। माहरेजको आगमनसँगै आर्सनलले एलेक्स अक्सलेड चेम्बरलिनलाई बेच्ने सम्भावना बढेको छ। २३ वर्षीय मिडफिल्डर एलेक्स लिभरपुल जाने सम्भावना बढेको छ।
