एजेन्सी (लण्डन)- चेल्सीका भुतपुर्व कप्तान जोन टेरीले च्याम्पियन्शिप क्लब एस्टन भिल्लासँग एक बर्षको सम्झौता गरेका छन्। ३६ बर्षे रक्षक टेरीको चेल्सीसँगको सम्झौता ३० जुनमा समाप्त भएको थियो।
चेल्सीसँग सम्झौता अन्त्य भएपछि पनि आफ्नो खेल जीवन जारी राख्ने निष्कर्षमा पुगेका टेरीले एस्टन भिल्लासँग सम्झौता गर्दा अनौठो अनुभूति भएको बताएका छन्। यदि भिल्ला प्रिमियर लिगमा उक्लेमा टेरीले प्रत्यक हप्ता १ करोड रुपैयाँ प्राप्त गर्ने छन्।
२२ बर्ष पछि चेल्सी छाडेका टेरीले सम्झौता समारोहमा बोल्दै भने,’ यो अनौठो हो तर सुन्नुहोस, म २२ बर्षमा पहिलो चोटी नयाँ क्लबमा आबद्द भएको छु र अब परिवर्तनको घडी आएको छ। मैले चेल्सीमा उत्कृष्ट समय विताए र म यहाँ पनि सोहि उदेश्य लिएर आएको छु। भिल्ला र म, हामी दुवै माथि जान चाहन्छौ।’
भिल्ला टेरीको करियरको तेस्रो क्लब हो। आफ्नो खेल जीवनको सुरुमै चेल्सीसँग आबद्ध टेरी सन् २०००मा लोनमा नटिङ्घम फरेस्ट पुगेका थिए।
