एजेन्सी – जर्मनीको राष्ट्रिय फुटबल टोली एवं इटालियन क्लब एएस रोमाको डिफेन्डर एन्टोनियो रुडीगर इङ्गलिस प्रिमियर लिग क्लब चेल्सीमा आउने भएका छन्। चेल्सीले गरेको ३० मिलियन पाउण्डको प्रस्ताव रोमाले स्वीकारेसँगै हाल क्लब र खेलाडीबीच सम्झौताबारे छलफल भइरहेको छ।
२४ वर्षीय डिफेन्डर रुडीगर इटालीमा व्यापक रंगभेद भएपछि रोमा छाड्ने मनसायमा थिए। यस्तैमा एन्टोनियो कन्टेले आगामी सिजनका लागी चेल्सीको डिफेन्सलाई अझ बलियो पार्ने लक्ष्य लिएर रुडीगरलाई भित्र्याउने प्रस्ताव राखेका थिए। गत सिजन चेल्सीले उपाधि जितेपनि सुरुवाती खेलमा भने डिफेन्सले निकै कमजोर प्रदर्शन गरेको थियो।
प्रशिक्षक कन्टेले युभेन्टसका लिओनार्डो बोनुची र साउथह्याम्पटनका भर्जिल भ्यान डाइकलाई क्लबमा ल्याउने प्रयास गरेपनि उक्त योजना असफल भएपछि रुडीगर तर्फ ध्यान मोडेका थिए। सामन्यतया डिफेन्सको मध्यभागमा खेल्न रुचाउने रुडीगर राइट ब्याकको भूमिकामा पनि खेल्न सक्छन।
गत सिजन सेजार एज्पिलीक्वेटा र भिक्टर मोसेसले औसत प्रदर्शन गरेपछि कन्टेले नयाँ डिफेन्डर भित्र्याएर थप प्रतिस्पर्धा गर्न लागेका हुन्। रुडीगर कन्फेडेरेसन कप विजयी जर्मनी टोलीका सदस्य रहेका थिए। उनले आगामी सन् २०१८मा हुने विश्वकपको टोलीमा खेल्ने लक्ष्य राखेका छन्। चेल्सीमा आबद्ध भएर नियमित फुटबल खेलेको खण्डमा उनको त्यो लक्ष्य सार्थक हुने सम्भावना बलियो छ।
