काठमाडौँ (हाम्रो खेलकुद) – अमेरिकाको डालसमा भएको दोस्रो एनएसी (नेपाल अमेरिका कन्भेन्सन) फुटबल प्रतियोगिताको उपाधि वासिङन डिसीले जितेको छ । बाल्टिमोर एफसीलाई आइतबार २–१ ले हराएको थियो । डिसीको पोस्ट नेपाली यू १९ का पूर्व गोलकिपर राजिव श्रेष्ठले सम्हालेका थिए ।
प्रतियोगिताको विजेता वासिङन डिसीका खेलाडी ।
डिसीका लागि दुवै गोल लोप्साङ तेन्जिङले गरेका थिए । उनै लोप्साङ प्रतियोगिताका सर्वोत्कृष्ट खेलाडी घोषित भएका थिए । प्रतियोगितामा अमेरिकामा रहेका नेपाली समूदायका १२ क्लबको सहभागिता रहेको थियो । नेपाली राष्ट्रिय टोलीका फरवार्ड भरत खवास र राष्ट्रिय टोलीका पूर्व मिडफिल्डर राजु तामाङले एलए एफसीबाट एनएसीमा प्रतिस्पर्धा गरेका थिए । तर उनीहरुको टोली क्वार्टरफाइनलमै रोकिएको छ ।
पूर्व राष्ट्रिय खेलाडीद्वय पर्वत पाण्डे र प्रलय राजभण्डारी न्यूयोर्क एफसीबाट खेलेका थिए भने यू १९ का पूर्व कप्तान प्रशान्त गिरी एभेरेष्ट एभरेष्टबाट खेलेका थिए । एनएसीले तीन दिने खेलकुद उत्सवमा फुटबलसँगै भलिबल, क्रिकेट र बास्केटबल लगायतका प्रतियोगिता आयोजना गरेको थियो । पुरुष भलिबल सान फान्सिस्कोले जितेको थियो ।
प्रतियोगिताको विजेता वासिङन डिसीका गोलकिपर राजिव श्रेष्ठ ।
