एजेन्सी – रियल म्याड्रिडले एटलेटिको म्याड्रिडका १९ वर्षीय डिफेन्डर थियो हर्नान्डेजलाई ६ वर्षको लागि अनुबन्धन गरेको छ। ११ वर्षको उमेरदेखि एटलेटिको म्याड्रिडबाट खेलेका हर्नान्डेजले एटलेटिको म्याड्रिडको नयाँ करारलाई नकार्दै रियल म्याड्रिड जान चाहेको इच्छा जाहेर गरेका थिए।
गत सिजन अलाभेसबाट ला लिगा खेलेका हर्नान्डेजको एटलेटिको म्याड्रिडसँग सन् २०२१सम्म सम्जौता थियो। तर रियल म्याड्रिडले उनलाई भित्र्याउन चाहेको भनेपछि हर्नान्डेजले जसरी भएपनि बर्नाबाउ जाने माग राखेका थिए। यसअघि रियल र एटलेटिको बीच एक अर्काको खेलाडी किनबेच नगर्ने भद्र सहमति रहेको थियो। तर यस स्थानान्तरणसँगै उक्त सहमति पनि तोडिएको छ।
एटलेटिको म्याड्रिडले एक विज्ञप्ति जारी गर्दै अन्य युरोपका क्लबले उनलाई अनुबन्धन गर्न खोजेको र एटलेटिको आफैंले पनि नयाँ करार दिन खोज्दा खेलाडी आफैंले सबै नकारेर रियल म्याड्रिडनै जाने निर्णय लिएको बताएको छ। उनलाई लिभरपुल र बार्सिलोनाले पनि अनुबन्धन गर्न खोजेका थिए।
यता रियल म्याड्रिडले भने मार्सेलोका उत्तराधिकारी बन्न सक्ने क्षमता भएका डिफेन्डरलाई सोमबार क्लबका समर्थक र मिडिया समक्ष प्रस्तुत गर्ने जानकारी दिएको छ।
