लिभरपुल (एजेन्सी) – एभर्टनका स्ट्राइकर रोमेलु लुकाकुलाई म्यानचेस्टर युनाइटेडले ओल्ड ट्राफर्डमा भित्र्याउन ७५ मिलियन पाउण्ड सम्म खर्चिन तयार रहे पनि लुकाकुबाट एभर्टनले भने ९० मिलियन पाउण्डसम्म कमाउने अपेक्षा गरेको छ।
चेल्सीबाट २०१४ मा २८ मिलियन पाउण्डमा एभर्टन पुगेका बेल्जियमका स्ट्राइकर लुकाकुलाई बोनस लगायत अन्य शर्तहरु जोड्दै एभर्टनले युनाईटेडसँग ९० मिलियन पाउण्ड बराबरको सम्झौताको अपेक्षा गरेको छ । युनाइटेड ७५ मिलियन पाउण्ड सम्म खर्चिन तयार भएपनि प्रिमियर लिगमा युवा अवस्थामा नै आफुलाई प्रमाणित गरिसकेका २४ वर्षीयलुकाकुको मूल्य एभर्टनले ९० मिलियन तोकेको छ ।
२०११ मा चेल्सीसँग आबद्ध भएका लुकाकु एभर्टनमा स्थायी रुपमा आउनु अघि वेस्ट ब्रोम र एभर्टनमा अस्थायी खेलाडीको रुपमा खेलेका थिए । सन् २०१४मा बेचेपनि यो सिजन चेल्सीले उनलाई पुनः अनुबन्ध गर्न तयार रहेको थियो। तर जोसे मोउरिन्होले पनि उनलाई भित्र्याउन चाहेपछि युनाइटेडले लुकाकुलाई किन्ने सम्भावना प्रवल बन्दै गएको छ ।
एभर्टन र युनाइटेड बीच सकारात्मक सम्झौताको निष्कर्षमा पुग्न सकेमा लुकाकु आउदो साताको अन्त्यसम्म म्यानचेस्टर युनाइटेडका खेलाडी बन्नेछन। एभर्टनको नयाँ सिजनको प्रशिक्षण बिहिबारबाट सुरु भएपनि लुकाकुले भने त्यसमा सहभागिता जनाएका छैनन्। पल पोग्बासँग अमेरिकामा बिदा मनाइरहेका लुकाकुले ५ वर्षको सम्झौता गर्ने बुझिएको छ।
