स्पेन (एजेन्सी)– अघिल्लो जुलाईमा कर छलीको अभियोगमा स्पेनको सर्वोच्च अदालतले २१ महिना जेल सजाय सुनाएपनि लियोनल मेस्सीले जरिवाना तिरेपछि उनको सजाय छुट भएको छ ।
सन् २००७ देखि २००९ को बीचमा ३ पटक कर छलेको अभियोगमा स्पेनको सर्वोच्च अदालतले मेस्सीलाई २१ महिना जेल सजाय सुनाएको थियो । विभिन्न देशका कम्पनी मार्फत कुल साढे ३ मिलियन पाउण्ड बराबरको कर छलेको आरोप र करिब ९ मिलियन पाउण्ड बराबरको कमाइ उनले लुकाएका थिए । मेस्सीले जरिवाना स्वरूप २ लाख ५० हजार पाउण्ड तिरे ।
शुक्रबार जरिवाना तिरेपछि मेस्सीको जेल सजाय छुट भएको स्पेनको अदालतले जनाएको छ । स्पेनिस कानुनका अनुसार २ वर्ष भन्दा कमको जेल सजाय जेलमा बिताउन बाध्य नहुने व्यवस्था छ । त्यसैकारणले मेस्सीले जेल सजाय नाकाटे पनि जरिवाना भने तिरेका हुन् । मेस्सीको पिता जोर्गेलाई सुनाइएको १५ महिने सजायपनि जरिवाना तिरेसँगै रोकिएको छ । जोर्गेले भने जरिवाना स्वरूप १ लाख ८० हजार पाउण्ड बुझाएका छन् ।
