म्यानचेस्टर (एजेन्सी)– म्यानचेस्टर युनाइटेडले बेल्जियन स्ट्राइकर रोमेलु लुकाकुसँग सम्झौता भएको जनाएको छ । युनाइटेडले लुकाकुको सरुवाका लागि एभर्टनसँग सहमति भएको उल्लेख गरेको छ । यद्दपी लुकाकुको मेडिकल र अन्य विषयमा भने सहमति हुन बाँकी रहेको बताइएको छ ।

युनाइटेडले ओल्ड ट्राफर्डमा भित्राउन ७५ मिलियन पाउण्ड सम्म खर्चिन तयार रहे पनि लुकाकुबाट एभर्टनले भने ९० मिलियन पाउण्डसम्म कमाउने अपेक्षा गरेको बताइएको थियो । चेल्सीबाट सन् २०१४ मा २८ मिलियन पाउण्डमा एभर्टन पुगेका बेल्जियमका स्ट्राइकर लुकाकुलाई बोनस लगायत अन्य शर्तहरु जोड्दै एभर्टनले युनाईटेडसँग ९० मिलियन पाउण्ड बराबरको सम्झौताको अपेक्षा गरेको जनाइएको थियो ।

युनाइटेड ७५ मिलियन पाउण्ड सम्म खर्चिन तयार भएपनि प्रिमियर लिगमा युवा अवस्थामा नै आफुलाई प्रमाणित गरिसकेका २४ वर्षीयलुकाकुको मूल्य एभर्टनले ९० मिलियन तोकेको छ । २०११ मा चेल्सीसँग आबद्ध भएका लुकाकु एभर्टनमा स्थायी रुपमा आउनु अघि वेस्ट ब्रोम र एभर्टनमा अस्थायी खेलाडीको रुपमा खेलेका थिए ।

२०१४मा बेचेपनि यो सिजन चेल्सीले उनलाई पुनः अनुबन्ध गर्न तयार रहेको थियो। तर जोसे मोउरिन्होले पनि उनलाई भित्र्याउन चाहेपछि युनाइटेडले लुकाकुलाई किन्ने सम्भावना प्रवल बनेको थियो ।