काठमाडौं (हाम्रो खेलकुद) – एएफसी यू२३ च्याम्पियनसिपको छनोट चरणको तयारीमा रहेका नेपाल र बंगलादेश यू२३ राष्ट्रिय फुटबल टोली मैत्रीपूर्ण खेलमा आमने-सामने हुँदैछन्। खेल एन्फा कम्प्लेक्सको कृत्रिम घाँसे मैदानमा मंगलबार दिउसो ३ बजे हुँदैछ।
खेलको पुर्वसन्ध्यामा आयोजित पत्रकार सम्मेलनमा बोल्दै बंगलादेशका अष्ट्रेलियन प्रशिक्षक एन्ड्रयु ओर्डले नेपाली टोलीसँगको खेल सहज नहुने बताएका छन्। ‘मैले नेपाली राष्ट्रिय टोलीको पछिल्ला २ खेल हेरेको छु। मैले टोली निकै छरितो, बलियो र आक्रमक पाएँ। अहिलेको टोलीमा पनि अधिकांश खेलाडी राष्ट्रिय टोलीको रहेको हुनाले मैले त्यस्तै किसिमको प्रदर्शनको अपेक्षा राखेको छु। भोलीको खेल दुवै टोलीको लागि सहज हुने छैन। घरेलु मैदान भएकाले नेपाललाई अलि फाइदा हुने देखिन्छ।’
उनले आफु भर्खरै मात्र बंगलादेशी टोली सम्हालेको र दक्षिण एसियाली फुटबलबारे धेरै जानकारी नरहेको पनि जानकारी दिए। एष्ट्रो टर्फमा खेल्नुपर्दा केहि फरक अनुभव हुने उनले बताए। ‘हामीले यहाँ खेलेको टर्फ र बंगलादेशमा रहेको टर्फमा भिन्नता छ। हाम्रो छनोट चरणको खेलमा पनि टर्फनै रहेको बुझेको छु। तर खेलाडीहरु घाँसे मैदानमा खेल्न मन पराउने र बानी परिसकेको कारण पनि केहि असहज पक्कै हुन्छ।’
उनले एएफसी यू२३ को छनोटमा भने टोली कठिन समूहमा रहेकोले केहि भन्न नसक्ने बताए। ‘हामी रहेको समूह निकै कठिन रहेको छ। आयोजक प्यालेस्टाइनसँगै जोर्डन र ताजिकिस्तान रहेको समूहमा हामीले सक्दो राम्रो प्रदर्शन गरेर नतिजाको अपेक्षा गर्ने हो।’
