म्युनिख (एजेन्सी) – बायर्न म्युनिखले रियल म्याड्रिडबाट कोलम्बियाली अन्तराष्ट्रिय खेलाडी हामेस रोड्रीगेजलाई २ बर्षको लागि लोनमा अनुबन्धन गरेको छ। मेडिकल पश्चात सम्झौता पत्रमा हामेसले हस्ताक्षर गर्ने बायर्नले आफ्नो वेबसाईटमा जनाएको छ। बायर्नले चाहेको खण्डमा २ बर्ष पछि खेलाडीलाई क्लबमै राख्न पनि सक्ने छ।
२५ बर्षे मिडफिल्डर सन् २०१४को विश्व कपमा ६ गोल गर्दै सर्बाधिक गोलकर्ता भएका थिए । मोनाकोबाट रियल पुगेर थुप्रै उपाधि आत्मसात गरेका थिए। हामेसले रियलका लागि १ सय ११ खेलमा ३६ गोल गर्दै ४१ गोलका लागि पास उपलब्ध गराएका थिए।
हामेसले मेडिकल सके लगत्तै अभ्यास सुरु गर्ने छन् र २५ जुलाईबाट सुरु हुने प्रि-सिजन भ्रमणमा सहभागिता जनाउने छन्। बायर्नले जुलाई २५ मा सिंगापुरको राष्ट्रिय रंगशालामा चेल्सीसँग खेल्ने तालिका रहेको छ।
