एजेन्सी – एसी मिलानक युवा गोलरक्षक जियानलुइजी डोन्नरुम्माले पुरानै क्लबमा नयाँ सम्झौता गरेपछि स्पेनिस टोली रियल म्याड्रिडको सबै प्रयास बिफल भएको छ। जुन महिनामा डोन्नरुम्माले एसी मिलानसँग नयाँ सम्झौता गर्न नमानेपछि रियलले उनलाई भित्र्याउने प्रयास गरेको थियो।
तर १८ वर्षीय गोलरक्षकले मंगलबार मिलानमै बस्ने निर्णय लिएको क्लबको वेबसाइटमा उल्लेख गरिएको छ। डोन्नारुम्माले मिलानसँग ४ वर्षको लागि नयाँ सम्झौता गरेका हुन्। इटालीको राष्ट्रिय टोलीका लागि ४ खेल खेलिसकेका डोन्नारुम्मालाई हाल राष्ट्रिय टोलीका कप्तान रहेका गोलरक्षक जियानलुइजी बुफोनको उत्तराधिकारीका रुपमा हेरिंदै आएको छ।
गत सिजन एसी मिलानका लागि सिजनको सबै ३८ लिग खेलमा सुरुवात गरेका डोन्नारुम्माले अहिलेसम्म क्लबका लागि ७० खेल खेलिसकेका छन्। उनले १६ वर्षको उमेरमै मिलानको सिनियर टोलीबाट खेलेका थिए। त्यसपछि नियमित पहिलो टोलीमा रहँदै आएका डोन्नारुम्मालाई मिलानले कम्तिमा सन् २०२१सम्म सानसिरोमै राख्ने पक्का भएको छ।
