काठमाडौँ (हाम्री खेलकुद) – एएफसी यू २३ च्याम्पियनसिपको छनोट चरणको पहिलो खेलमा नेपालले घरेलु टोली युएई को सामना गर्दैछ। नेपाली समयानुसार रातको ८:१० बजे सुरु हुने खेलमा नेपालको कप्तानी विमल घर्ति मगरले गर्नेछन्।
प्रशिक्षक राजु काजी शाक्यले बंगलादेश विरुद्ध उत्रिएको टोलीबाट एक वा दुइ परिवर्तन गर्ने सम्भावना रहेको छ। राष्ट्रिय टोलीका १० खेलाडी रहेकोमा सबै १० खेलाडीले सुरुवात गर्ने सम्भावना छ। लेफ्ट ब्याकमा अमित तामाङ र कमल श्रेष्ठमा एक खेलाडीले खेल्नेछन्। बंगालदेश विरुद्धको पछिल्लो खेलमा कमल बिरामी परेकाले उपस्थित थिएनन्।
यता, मिडफिल्डमा हेमन्त र हेमनको उपस्थितिले डिफेन्सिभ रुपमा कमजोर हुने कारणले प्रशिक्षकले परिवर्तन गर्ने सम्भावना उत्तिकै छ। बंगलादेश विरुद्धको खेलमा सुरुवातमा खेलेका हेमन र हेमन्तको जोडीले मिडफिल्ड सम्हाल्न सकेको थिएन। तर पुजनको आगमनले टोलीमा केहि स्थिरता देखिएको थियो।
गोलरक्षक: एलन न्यौपाने
डिफेन्स: दिनेश राजवंशी – अनन्त तामाङ – गौरब बुढाथोकी – कमल श्रेष्ठ/अमित तामाङ
मिडफिल्ड: सुमन लामा – हेमन गुरुङ/पुजन उपरकोटी – हेमन्त थापा मगर – सुनिल बल
फरवार्ड: बिमल घर्ती मगर – अन्जन बिष्ट
