म्यानचेस्टर (एजेन्सी)– टोटेनह्यामबाट म्यानचेस्टर सिटी पुगेका कायल वाल्कर सबै भन्दा महंगा डिफेन्डर बनेका छन् । सिटीले टोटेनह्यामलाई वाल्करका लागि ५० मिलियन पाउण्ड खर्चेको छ । विभिन्न ‘एड अन’ साथ सिटी पुगेका वाल्करको रकम ५३ मिलियन सम्म पुग्न सक्ने सम्भावना छ ।
एड अन सहित ५३ मिलियन पाउण्डको मूल्य बराबरका वाल्करले यसघि चेल्सीबाट पिएसजी जाँदा डिभिड लुइजलाई खर्चिएको ५० मिलियन पाउण्डलाई उछिन्दै सबै भन्दा महंगा डिफेन्डर बन्ने सम्भावना बोकेका छन् । त्यस्तै इङ्ल्यान्डका लागि २७ खेल खेलेका वाल्कर सबै भन्दा महंगा इंङ्लिस खेलाडी पनि बनेका हुन् ।
‘मैले टोटेनह्यामबाट धेरै वर्ष खेलेको कारण अहिले सिटी पुग्दा अनौठो लागेको छु ,’ वाल्करले सिटीको आधिकारिक वेभसाइटलाई भने,‘ तर मेरो करियरमा नयाँ सुरुवात हँुदा म खुसी छु । म सिटीमा ट्रफी जित्न चाहन्छु ।’
सिफिल्ड युनाइटेडबाट सन् २००९ मा लन्डनको क्लब पुगेका वाल्करले टोटेनह्याममा ८ वर्ष बिताउने क्रममा २ सय २७ खेल खेलेका थिए । टोटेनह्यामसँग रहदाको अवधिमा उनले क्विन्स पार्क रेन्जर्स , सिफिल्ड युनाइटेड र एस्टन भिल्लाबाट लोनमा खेले ।
