एजेन्सी – स्पेनिस क्लब बार्सिलोनाले पोर्चुगलको राष्ट्रिय टोलीको सदस्य डिफेन्डर नेल्सन सेमेडोलाई ३० मिलियन पाउण्ड खर्च गरेर अनुबन्धन गरेको छ। अहिलेसम्म ६ पटक राष्ट्रिय टोलीको जर्सी पहिरिएका सेमेडोले कन्फेडेरेसन कपमा पनि सहभागिता जनाएका थिए।
LLUIS GENE/AFP/Getty Images)
२३ वर्षीय डिफेन्डर सेमेडोले यसअघी बेनफिकाबाट व्यवसायिक फुटबल खेल्दै आएका थिए। उनले बार्सिलोनासँग ५ वर्षको सम्झौतामा हस्ताक्षर गरिसकेका छन्। उनको आगमनसँगै बार्सिलोनाले नयाँ सिजनका लागि ३ खेलाडीलाई भित्र्याएको छ। यसअघी बार्साले विङ्गर डेउलेफेउ र डिफेन्डर मार्लोनलाई भित्र्याइसकेको छ।
बार्सिलोनाले यसअघि आर्सनलका डिफेन्डर हेक्टर बेल्लेरिनलाई क्लबमा फिर्ता ल्याउने प्रयास गरेपनि असफल रहेको थियो। युवा अवस्थामा बार्सा छाडेर आर्सनल पुगेका बेल्लेरिनलाई आर्सनलले कुनै हालतमा बिक्री नगर्ने प्रष्ट पारेपछि बार्साले सेमेडोलाई क्लबमा अनुबन्धित गरेको हो।
सेमेडोले बार्सिलोनाको टोलीसँग सोमबारबाट प्रशिक्षण थाल्नेछन्। उनले क्लबको प्रि-सिजन खेलमा डेब्यु गर्ने सम्भावना रहेको छ।
