पोखरा (हाम्रो खेलकुद)– आहा रारा गोल्ड कपको पछिल्लो संस्करणबाट झन्डै २८ लाख रुपैयाँ बचत हुँदै आएको छ । सहारा एकेडेमीको सञ्चालन समेत गर्दै आएको पोखराको सहारा क्लबले शनिबार १५ औं संस्करणको आयोजनाको आयव्यय सार्वजनिक गर्दै २८ लाख ७८ हजार रुपैयाँ बचत भएको जानकारी दिएको छ ।

आहा रारा गोल्ड कप गत माघ ४ देखि १५ गतेसम्म पोखरा रंगशालाामा आयोजना भएको थियो । ११ दिने प्रतियोगितामा ९७ लाख १० हजार ७ सय ६५ रुपैयाँ आम्दानी भएकोमा र त्यसमा प्रतियोगिता आयोजनामा ६९ लाख ३२ हजार ५ सय ७४ रुपैयाँ खर्च भएको क्लबका सल्लाहकार एवं अर्थ संकलन उपसमिति संयोजक टिका बहादुर कार्कीले जानकारी दिए ।

अघिल्लो संस्करणको तुलनामा यो पटक नाफामा केही कमी भएको छ । १४ औं संस्करणमा क्लबले ३५ लाख रुपैयाँ बचत गरेको थियो । अर्थ संयोजक कार्कीका अनुसार टिकट शुल्कबाट ४१ लाख ५० हजार ३ सय ७० रुपैया आम्दानी भएको थियो । जसमा गेट टिकटबाट ३९ लाख ८२ हजार ३ सय ७० र सिजनल टिकटबाट १ लाख ६८ हजार रुपैयाँ रहेको छ ।

व्यानर एवं आर्थिक सहयोगबाट २२ लाख ६ हजार ५५, मुख्य प्रयोजक आहा तथा रारा चाउचाउबाट ११ लाख, उप–प्रायोजक माईक्रो म्याक्स मोबाईलबाट २ लाख ९७ हजार ५ सय, गोर्खा बु्रअरीबााट २ लाख ५५ हजार, पाँच विधा प्रायोजक पृथ्बीराजमार्ग बस संचालक समितिबाट १ लाख ५० हजार, नोभा शुद्ध र ताजा दुधबाट १ लाख ६० हजार रुपैयाँ प्राप्त भएको बताइएको छ ।

त्यस्तै दैनिक खेलाडी भ्रमण खर्च म्याच मनि सहित २४ लाख २६ हजार ९ सय ६१ रुपैया खर्च भएको अर्थ संयोजक कार्कीले जनाए । त्यसै गरी प्रोत्साहन खर्च ८ लाख ५२ हजार, आयोजक टिम तयारी खर्च ६ लाख ८३ हजार १ सय २ रुपैया, प्रचार प्रसार खर्च ३ लाख २८ हजार ७ सय ९०, रेफ्रि खर्च ४ लाख ७ हजार ९ सय ७५ रुपैया, मैदान, स्टेज, प्यरापिट ब्याबस्थापन खर्च ५ लाख ६० हजार ५ सय ७० रुपैया, अतिथि सत्कार खर्च २ लाख ३३ हजार लगायतको शीर्षकमा खर्च भएको बताइएको छ ।

प्रतियोगितामा अमेरीका, बंगलादेश, भारतबाट एक एक तथा नेपालका अन्य गरि १२ टोलीको सहभागिता रहेको थियो । आरा रारा गोल्ड कपको उपाधि लक्ष्मी हुन्डाई मनाङ मस्र्याङ्दीले जितेको थियो । प्रतियोगिताबाट बचत रकम सहारा एकेडेमीका बालकहरुको भरणपोषणमा खर्च गरिने क्लबका अध्यक्ष विरभद्र आचार्यले बताए ।

सहारा एकेडेमीमा हाल १६ जिल्लाका गरिव तथा विपन्न बर्गका २८ जना बालकहरु रहेको महासचिव केशवराज बरालले बताए । बार्षिक रुपमा सहारा एकेडेमी संचालन गर्न करिब २२ लाख खर्च रुपैयाँ खर्च हुने क्लबले जनाएको छ ।

एकेडेमीको दिगो व्याबस्थापनको लागि स्थापना गरिएको अक्षयकोषमा हालसम्म करिब एक करोड २५ लाख रुपैया संकलन भएको आचार्यले जनाए । उनले अक्षय कोष २ करोड रुपैयाँको पुर्याउने क्लबको लक्ष्य छ । आहा रारा गोल्ड कपको मुख्य प्रायोजक हिमश्री फ्ड्स प्रालिका अध्यक्ष सुर्य बहादुर केसीले सहारा क्लबले राम्रो कामलाई निरन्तरता दिदै आएकोले आफुहरुले निरन्तर रुपमा साथ दिइरहेको बताए ।