कार्तिक ३० गते, काठमाडौं ।
घुँडाको चोटका कारण राष्ट्रिय फूटबल टिममा भरपर्दा फरवार्ड भरत खवासले डिसेम्बरमा हुन् साफ च्याम्पिएनशिप खेल्न नसक्ने भएका छन्|
नेपाल र भारत बिच गत अगष्टमा खेलिएको मैत्रिपुर्ण खेलको प्रशिक्षणमा चोट बोकेका भरतले चोटका बावजुद भारतमा खेलेका थिए| त्यसलगत्तै राष्ट्रिय लिगमा पनि आर्मीका लागि उनले धेरै खेल खेले| कतिपय खेलमा पहिलो हाफमै निस्किएका उनलाई आराम गर्न दिइएको थिएन|
राष्ट्रिय टोलीको प्रशिक्षणमा विगत एक महिनादेखि प्रशिक्षणरत खवासलाई पुन: घुँडामा समस्या देखिएपछि एम.आर.आई गर्न भनिएको थियो| रिपोर्टका अनुसार उनको घुँडाको शल्यक्रिया गर्नु पर्ने देखिएको र सो गरे कम्तिमा सात महिना विश्राम लिनुपर्नेछ|
अनुभवी खेलाडीको कमी रहेको अवस्थामा यो चोटले टोलीलाई धक्का पुगेको छ| २७ जनाको लिष्टमा समावेश पाँच फरवार्ड मध्य एक खवास अब साफका लागि टोलीमा हुनेछैनन्|
